OÉ-CUSSE, 23 Jullu 2021 (TATOLI)—Ministério Edukasaun Juventude no Desportu (MEJD) liuhosi Institutu Nasionál Formasaun Dosente no Profisionál Edukasaun (INFORDEPE, sigla portugés), sesta ne’e hala’o abertura estájiu pedagójiku ba manorin (profesór) rejime kontratadu 184 iha Rejiaun Administrativa Espesiál Oé-Cusse Ambeno (RAEOA).
Diretór Interinu Edukasaun RAEOA, João Boquifai, hateten estájiu pedagójiku ne’e hala’o durante fulan tolu (3) hahú hosi 23 jullu-30 setembru 2021, atu kompleta prosesu ensinu aprendizajen iha Univesidade Nasionál Timor Lorosa’e (UNTL) iha Oé-Cusse, tanba kriteria atu sai manorin tenke iha kualifikasaun edukasaun ho dixiplina hodi bele garante kualidade edukasaun.
“Sai profesór tenke iha diploma iha área edukasaun mak foin hala”o funsaun hanesan profesór baxarelatu. Estajiáriu sira-ne’e sei fila-fali ba ida-idak nia fatin hodi halo prátika pedagójika kada sentru formasaun. Persiza hatudu dixiplina tanba profesór mak sei hanorin ema atu sai matenek iha nasaun ne’e,” João Boquifai hato’o liuhosi diskursu iha serim’onia abertura ne’ebé realiza iha salaun alfandega Palaban, suku Costa, Sub-rejiaun Pante Makasar, sesta ne’e.
Dirijente edukasaun ne’e apela ba manorin estajiáriu sira-ne’e, durante fulan tolu (3) sei halo estájiu pedagójiku iha sentru formasaun hamutuk 23 iha EBF, EBC nomós iha eskola sekúndária tékniku vokasionál no jerál.
Iha faze estájiu ne’e sei hetan orientasaun hosi orientadór hamutuk na’in-lima (5), nune’e estudante sira tenke esforsu durante prosesu prátika estájiu nian persiza hatudu dixiplina no hatudu valór di’ak.
Sekretária Rejionál Asuntu Edukasaun Solidariedade Sosiál no Inkluzaun, Avelina da Costa, hateten nu’udar edukadór iha akadémiku persiza hakat faze ba faze, nune’e bele to’o iha faze graduasaun nian.
“Ita-boot sira agora manorin, hot-hotu ezerse funsaun hanesan profesór kontratadu. Ohin, ita halo abertura ba estajiu durante fulan tolu mak ita-boot sira prátika siénsia ne’ebé hetan ona liu-liu iha prátika pedagojika nian, kona-ba oinsá atu hasoru alunu sira,” nia dehan.
Entretantu manorin hirak ne’e hahú sira-ni prosesu aprendizajen iha 2017 ne’e hamutuk na’in 231, maibé na’in-neen (6) la ativu, na’in (1) ramata kursu iha lisensiadu no na’in haat (4) mate.
Daudaun ne’e, numeru ne’ebé sei eziste to’o agora atu tuir estájiu pedagójiku hamutuk 184 no totál dosente hamutuk na’in-lima (5).
Jornalista : Abilio Elo Nini
Editór : Cancio Ximenes
