DILI, 23 jullu 2021 (TATOLI) – Prezidente Federasaun Futeból Timor-Leste (FFTL) atuál Ministru Asuntu Parlamentár no Komunikasaun (MAPKOMS), Francisco Jerónimo, ko’alia ona ho Primeiru-Ministru (PM) Taur Matan Ruak no konkorda hodi entrega Estádiu Munisipál Dili ba FFTL hodi dezenvolve.
“Ami halo ona prosesu husu ba Governu no Primeiru-Ministru konkorda tebes Estádiu Dili entrega ba FFTL no ami halo kontratu ida ho Governu ba tinan 20,” Francisco Jerónimo informa hodi responde Agência Tatoli iha edifísiu FFTL, Dili, sesta ne’e.
Nia dehan, bainhira Governu entrega ona ba FFTL maka sira-nia parte sei moderniza Estádiu ne’e sai estandar internasionál iha Timor-Leste. Nune’e, bele iha ona oportunidade atu jogu internasionál sira hanesan AFC Cup, AFF no Suzuki bele halo ona iha Timor-Leste no hosi atividade sira ne’e belo arrola reseita ekonomia ba Estadu.
Prosesu reabilitasaun Estádiu Munisipál Dili
Iha 2015 ba liubá, Sekretáriu Estadu Juventude no Desportu (SEJD), Leovigildo Hornay iha VI Governu Konstitusionál loke tenderizasaun no kompañia Marino Interprise mak hetan oportunidade hodi halo reabilitasaun ba Estádiu ne’e ho valor orsamentu millaun $1.5 maibé la konsege finalize.
Iha fali VII Governu Konstitusionál ne’ebé lidera hosi Primeiru-Ministru Marí Alkatiri no Sekretáriu Estadu Juventude no Desportu (SEJD), Osorio Florindo, durante fulan sia (9) maibé la konsege rezolve.
Iha VIII Governu Konstitusionál lideradu hosi Primeiru-Ministru Taur Matan Ruak no SEJD Nelio Isaac Sarmento, hapara tiha servisu kompañia Marino Interprise no la konsege rezolve buat ida iha prosesu halo reabilitasaun ba estádiu Dili ne’e.
Nafatin iha VIII Governu ho Primeiru-Ministru no SEJD troka fali ho Abrão Saldanha hahú atu dezenvolve fali, maibé ninia prosesu iha hela KAFI no ADN nia liman.
Jornalista : Hortencio Sanchez
Editór : Francisco Simões
