OÉ-CUSSE, 23 Jullu 2021 (TATOLI)—Sekretáriu Rejionál Asuntu Agríkultura, José Eta, inaugura projetu kanalizasaun bee-moos iha bairru Maun-Muti, aldeia Malelat, suku Malelat, sub-rejiaun Pasabe, ne’ebé konstrui hosi Organizasaun Naun Guvernamentál (ONG) Centru Edukasaun Civica Enclave Oé-Cusse (CECEO) ne’ebé hetan apoiu fundu hosi Caritas Austrália.
“Ha’u husu ba komunidade sira depois inaugurasaun persiza mós halo konservasaun ba área bee-matan, hodi garantia katak bee-matan ne’ebé mak kanaliza ona ba komunidade sira bele garantia nia sustentabilidade ba débitu bee-moos ne’e,” José Eta informa ba Agência Tatoli, via telefonika, sesta ne’e.
Autoridade ne’e informa ba komunidade benefisiáriu katak iha sistema kanalizasaun bee-moos ne’e bele uza didi’ak, kuidadu instalasaun bee-moos ne’e tanba autoridade RAEOA nia programa prioridade primeiru mak rezolve problema bee-moos iha Oé-Cusse.
Aleinde ne’e, nia informa, programa Food For Work liu-liu ba konservasaun bee-matan sira parténsia suku Malelat nian mós, iha bee-matan ida atu inklui halo konservasaun.
Diretór ONG CECEO, Juvinál Faria, hateten programa ne’e mai hosi Caritás Austrália servisu hamutuk ho ONG CECEO nu’udár implementadór ba programa kanalizasaun bee-moos iha bairru Maun-Muti, aldeia Malelat
“ONG CECEO hamutuk ho parseiru Caritas Austrália hahú prosesu identifikasaun ba bee-matan ne’e iha kedas 2019. Ami halo planu asaun, nune’e ami identifika rezultadu iha problema bee-moos ne’ebé komunidade enfrenta. Tanba ne’e maka CECEO husu apoiu ba Caritas ho objetivu atu tulun komunidade sira iha suku Malelat atu hakbesik bee-moos ba sira,” nia dehan.
Xefe Suku Malelat, José Marques, agradese ba parseiru sira hosi ONG CECEO no Caritas Austrália tanba primeira-vez halo kanalizasaun bee-moos iha suku Malelat.
“Lori ha’u-nia komunidade nia naran hato’o agradese ba parseiru ONG CECEO ho Caritas Austrália, tanba apoiu ona fasilidade ne’e ba ha’u-nia suku. Ohin, foin primeira-vez halo kanalizasaun bee-moos ba komunidade, tanba suku ne’e izoladu tebes hosi suku 17 iha RAEOA,” nia hateten.
Entretantu orsamentu ba kanalizasaun bee-moos ne’e hamutuk rihun $9.576.50, ho nia distánsia metro 1.500, fahe ba torneira neen (6) fó benefisia ba komunidade uma kain kauze 80 ho populasaun 250, hosi totál populasaun iha suku Malelat hamutuk 1.831 kompostu hosi aldeia ida de’it.
Jornalista : Abilio Elo Nini
Editór : Cancio Ximenes
