VIQUEQUE, 25 jullu 2021 (TATOLI)- Ministériu Edukasaun, Juventude no Desportu (MEJD) no Konsellu Konsultivu Munisipál Viqueque deside ona hodi re-ativa ensinu aprendizajen aula prejensiál ba eskola sira hotu iha Munisípiu Viqueque. Maske nune’e, tenke kumpre ba medida prevensaun COVID-19.
Realidade iha Eskola Báziku Sentrál Komandante Rosito, Beaço ninia Eskola Bázika Filial 117 Luga-Asa, hatudu estudante barak la uza máskara hodi kumpre ba regra saúde públiku iha luta foun ba prevensaun peste letál COVID-19.
“Ami la’o tuir instrusaun husi parte OMS no Ministériu Saúde hodi uza máskara no fase liman. Máskara ne’ebé iha eskola antes ne’e ami fahe ona ba estudante sira kada estudante ida hetan máskara ida. Maibé foin lalais reativa ami husu fali estudante sira katak máskara ne’ebé sira simu lakon hotu ona, tanba ne’e maka ita haree estudante sira barak la uza máskara,” koordenadór EBF 117 Luga-Asa, Mateus Almeida hateten ba Agência Tatoli iha EBF 117 Luga-Asa, Suku Uma Uain Leten, Viqueque, sábadu (24/07).
Mateus hateten, profesór sira nafatin husu estudante Bázika Filial 117 Luga-Asa uza máskara no profesór sira sei fó hatene ba estudante sira-nia inan-aman hodi sosa máskara ba oan atu uza ba eskola.
Alende ne’e mós nia dehan, planu MEJD re-ativa eskola parte ida fó fali ona oportunidade ba estudante sira atu aprende fali matéria tanba durante fulan hirak ne’e estudante barak la estuda matéria.
Eskola EBF 117 Luga-Asa re-ativa iha loron 19 jullu 202 no estudante eskola refere hamutuk na’in-333 ho profesór na’in-14.
Iha fatin seluk Diretór Edukasaun Munisípiu Viqueque, Emídio Amaral informa, edukasaun Munisípiu Viqueque sei kolabora ho parte saúde Munisípiu Viqueque atu halo teste masál ba eskola sira iha Munisípiu Viqueque tanba eskola rua rejista kazu pozitivu ona.
Kazu pozitivu ne’ebé rejista loron 19 jullu 2021 iha eskola sekundáriu privada Canosa ema na’in-lima no sekundáriu Liçeu na’in-tolu ho totál kazu pozitivu iha Munisípiu Viqueque na’in-lima, kazu pozitivu ativu na’in-44.
Jornalista : Vitorino Lopes da Costa
Editór : Francisco Simões
