COVALIMA, 27 jullu 2021 (TATOLI) – Sekretária Estadu Arte no Kultura (SEAC, sigla portugés) realiza sensibilizasaun ba autoridade lokál kona-ba valor kulturál no konvensaun sira UNESCO nian hosi 1972, 2003 no 2005.
“Ita hatene katak se la iha ema, kultura sei la eziste no kultura eziste tanba iha ema, ema mak halo nia movimentasaun ba iha asaun liga ba atividade kulturál hodi hamosu kultura rasik,” Diretór Jerál SEAC, Manuel Ximenes Smith, hateten iha ámbitu sensibilizasaun valor kulturál iha Covalima, tersa ne’e.
Objetivu sensibilizasaun ne’e, oinsá atu haree papél konjunta entre Governu ho komunidade sira, hodi hakbesik an ba lia-na’in, juventude no lider komunitária sira .Timor Leste iha atividade kulturál liuhosi vida umana, hanesan hosi ema nia hatais, jestaun no pensamentu.
Xefe Suku Suai Loro, Martinho Mendonça, agradese ba SEAC ne’ebé partilla ona ho sira kona-ba valor kulturál ne’ebé haktuir iha konvensaun UNESCO nian.
Iha sensibilizasaun ne’e partisipa hosi lia-na’in, autoridade lokál, organizasaun noun Governamentál (ONG) komunidade no estudante sira.
Jornalista : Celestina Teles
Editór : Francisco Simões
