BAUCAU, 27 jullu 2021 (TATOLI)–Sekretáriu Estadu Protesaun Sivil (SEPS), Joaquim Gusmão, konsidera importante tebes atu sosializa Lei Protesaun Sivil atu entidade hotu bele komprende lejizlasaun ne’e hafoin hetan promulgasaun.
“Normalmente bainhira Prezidente Repúblika promulga, importante maka presiza halo sosializasaun inklui armonia ba lei seluk ne’ebé karik ligadu ho lei refere, tanba ne’e ita presiza halo sosializasaun ba entidade hotu, liuliu entidade públika sira atu koñese no hatene didi’ak kontiúdu hosi Lei Protesaun Sivil,” Sekretáriu Estadu informa iha Sentru Konvensaun Baucau (CCB, sigla portugés), Villa antiga, tersa ne’e.
Notísia relevante: PN Aprova Ona Proposta-Lei Protesaun Sívil
Lei ne’e halo ona sosializasaun iha munisípiu Lautém no Viqueque no ohin iha Baucau no Manatuto.
“Ita komesa sosializa ona ba entidade hotu, hahú hosi munisípiu to’o nasionál hodi bele esplika kontiúdu lei ne’e rasik,” nia akresenta.
Nia dehan, VIII Governu Konstitusional fó responsável ba membru Governu ne’ebé toma konta ba protesaun sivil atu haree ba kestaun sosializasaun no dezenvolve ona autoridade protesaun sivil hodi bele kompleta pilar tolu hosi hosi Lei Seguransa Nasionál hanesan seguransa interna, externa no protesaun sivil.
Sosializasaun lei ne’e ba autoridade munisipál, postu no suku iha munisípiu Baucau, sosiedade sivil inklui entidade públika.
Lei Protesaun Sivil númeru 12/2020 02 dezembru aprova iha Parlamentu Nasionál iha jullu 2020 no promulga iha novembru 2020, hafoin tama iha entrada vigór iha loron 01 janeiru 2021.
Lei foun ne’e hodi kriminaliza komunidade ne’ebé harii uma iha fatin risku ba dezastre naturál, hanesan mota ninin, foho lolon, tasi ninin no besik lagoa.
Lei Protesaun Sivil ne’e kompostu hosi kapitulu hitu hanesan, kaptilu I dispozisaun jerál, kapitulu II situasaun alerta, kontinjénsia no kalamidade, kapitulu III diresaun no koordenasaun polítika protesaun sivil, kapitulu IV estrutura ezekutiva protesaun sivíl, kapítulu V operasaun protesaun sivíl, kapítulu VI forsa defeza no seguransa no kapítulu VII dispozisaun finál, ho nia artigu hamutuk 59.
Jornalista : Natalino Belo
Editora : Julia Chatarina
