OÉ-CUSSE, 27 Jullu 2021 (TATOLI)—Xefe Suku Costa, Sub-Rejiaun Pante Makasar, Aleixo Abi, hateten populasaun uma kain 60 iha aldeia Laku-Foan no aldeia Oétfo, suku Costa seidauk asesu eletrisidade
Notísia Relevante: RAEOA prevee millaun $1,2 kompleta liña eletrisidade
“Ha’u-nia komunidade iha aldeia Oéfo kuaze uma kain 20 hanesan ne’e no uma kain 40 iha aldeia Laku-Foan mak seidauk asesu eletrisidade. Problema ne’e ami hato’o ona ba iha autoridade RAEOA iha tinan rua (2) liubá maibé to’o ohin seidauk iha resposta. Maibé espera bele resolve,” Xefe Suku ne’e hateten ba Agência Tatoli iha sede suku Costa, sub-rejiaun Pante Makasar, tersa ne’e.
Líder komunitária ne’e hateten, iha tinan 2014 Guvernu fasilita solár painél distribui ba komunidade sira iha aldeia Mahata bairru Kutete, Oétfo no Lakufoan, no balun iha inisiativa halibur osan hamutuk hola rasik materiál hodi bele asesu eletrisidade.
Antes ne’e, Xefe Departementu EDTL Oé-Cusse, Armindo Mendonça, informa katak Dirasaun Infraestrutura Rejionál aloka ona milliaun $1.2 atu kompleta liña eletrisidade iha área remota atu nune’e populasaun iha RAEOA bele asesu eletrisidade 100%.
Planu atu halo eliminasaun eletrisidade de Timor-Leste (EDTL) tau ona ajenda atu implementa iha tinan ne’e, tanba Planta no Kadernu Enkargo (Bill of Quantity) prepara ona, no uma kain sira-ne’ebé hela besik iha liña eletrisidade sei dada uluk ba sira, no hirak ne’ebé hela dook-liu sei apoia monta solár painél
“Osan iha ona no dezeñu BoQ prepara ona maibé ita presiza finaliza servisu téknika ruma. Faze preparasaun di’ak ona mak foin bele halo konkursu públiku, tanba ne’e servisu anteriór nian ho nia orsamentu atu halo kompleta hamutuk millaun $1.2,” nia dehan
Entretantu totál populasaun iha suku Costa hamutuk 17.351 kompostu hosi aldeia lima (5) mak aldeia Sanane populasaun hamutuk 11.237, aldeia Mahata 1.899, aldeia Oétfo 1.067, aldeia Lakufoan 707 no aldeia Oésono 2.441.
Jornalista : Abilio Elo Nini
Editór : Cancio Ximenes
