DILI, 28 jullu 2021 (TATOLI)-–Ministru Petróleu no Minerál (MPM), Víctor da Conceição Soares, aprezenta planu projetu konstrusaun terminál importasaun petróleu iha Metinaro, munisípiu Dili iha reuniaun Konsellu Ministru (KM).
“Konstrusaun ne’e ho objetivu hodi garante stock estratéjiku nasionál petróleu ba loron 90 no stock adisionál ba loron 30, ba komersializasaun hosi Timor Gás no Petróleu, Empreza Públika (Timor GAP, E.P),” Ministru Prezidénsia Konsellu Ministru, Fidelis Manuel Leite Magalhães, hateten hafoin reuniaun KM, iha Palásiu Governu, kuarta ne’e.
Terminál ne’e sei lokaliza iha aldeia Manleu, suku Wenunuk, postu administrativu Metinaro, munisípiu Dili, ne’ebé sei iha kapasidade hodi armazena petróleu ba loron 120.
Daudaun ne’e, Timor GAP, E.P halo ona kontratu ho Eletricidade de Timor-Leste, Empreza Públika, (EDTL, E.P) hodi fornese kombustível ba sentrál elétrika Betano.
Notísia relevante: EDTL-Timor GAP konklui deskargamentu mina ba sentrál elétrika Betano
Tuir kontratu, Timor GAP iha obrigasaun atu fornese kombustível litru millaun 32, ne’ebé iha faze dahuluk fornese ona litru millaun $1,5 no iha faze daruak koopera ho empreza fornesedór hosi Singapura hodi fornese tan litru millaun 16, ne’ebé falta litru millaun 13 ne’ebé sei kompleta iha setembru no outubru tinan ne’e.
Enkuantu, kontratu entre parte rua ho objetivu ba interese públika, ne’ebé bazeia ba kontratu ne’e, Timor GAP sei fornese kombustível ba sentrál elétrika Betano iha tinan-tolu nia laran, hahú hosi tinan 2021 to’o 2023, ho kustu orsamentu millaun $59.
Jornalista : Florêncio Miranda Ximenes
Editora : Julia Chatarina
