DILI, 30 jullu 2021 (TATOLI)-Primeiru-Ministru (PM), Taur Matan Ruak, afirma sorumutuk Timor-Leste ho Parseiru sira Dezenvolvimentu nian ne’ebé organiza husi Ministériu Finansa (MF), iha momentu enkruzilhada istórika ida-ne’ebé ita hamutuk hasoru efeitu sira ne’ebé molok ne’e nunka akontese husi pandemia COVID-19 nian.
Efeitu hirak-ne’e, xefe governu hatutan, agrava tebetebes tanba krize sira iha ita-nia país, liuliu krize orsamentál, krize polítika no katástrofe naturál sira ne’ebé hatudu momoos frajilidade ekonómika no difikuldade estruturál sira, hodi halo teste ba ita-nia reziliénsia, ita-nia liberdade sira no sustentabilidade ba ita-nia demokrasia.
“Senáriu krize daudaun ne’e ajuda hodi reforsa ita-nia espíritu nasionál no determinasaun Governu nian hodi kontinua luta ba objetivu nasionál boot sira ne’ebé potensialidade sempre mosu iha komportamentu no atitude Timoroan sira nian, ne’ebé halibur Timor-Leste kontra pobreza no no afavór ba justisa sosiál no oportunidade ne’ebé hanesan, atubele kumpre promesa moris di’ak nian ida ba sidadania ida ne’ebé ativa, produtiva no partisipativa liután, konsiente ba direitu no devér hodi hametin demokrasia”, Taur Matan Ruak, hateten iha auditóriu Ministériu Finansa, sesta ne’e.
Nia hatutan, durante luta ba ukun-rasik-an tinan 24 nia laran, Timor-oan sira nafatin hatudu sira-nia kapasidade adaptasaun, rezisténsia no aptidaun nian ne’ebé boot hodi hakat liu dezafiu boot sira.
“Ita sei hatudu filafali kapasidade povu Timor-oan nian ne’e iha siklu foun esperansa nian, ne’ebé motiva liuhusi Planu Nasionál Vasinasaun kontra COVID-19, ne’ebé permite ita hodi haree ba futuru ho otimizmu ida-ne’ebé nakonu ho oportunidade sira, hodi lori kreximentu no kria benefísiu ekonómiku signifikativu sira ba ema hotu”, Xefe Governu subliña.
Xefe ezekutivu ne’e adianta, futuru ida-ne’ebé mós ho dezafiu sira ne’ebé sei ezije esforsu boot ida ba reforma sira no empeñu hodi apoia Governu ida-ne’ebé efikás no efisiente liu, koordenadu liu, menus burokrátiku, dijitál liu, ho kapasidade hodi estimula diversifikasaun ekonómika no atrai investimentu sira, hodi insentiva produsaun nasionál no kriasaun rikeza iha país laran.
Nune’e mós futuru ida-ne’ebé labele manan mesak, maibé depende ba partisipasaun ema hotu nian, sidadaun, família, empreza no organizasaun sosiedade sivíl sira no depende mós ba apoiu husi parseiru sira dezenvolvimentu nian.
Futuru ida-ne’ebé harii lorloron, ho parseria fundamentál foun sira, ne’ebé fornese husi ajénsia kooperasaun nasionál no internasionál oioin, bilaterál no multilaterál ne’ebé hala’o serbisu iha Timor-Leste, ne’ebé fó ona kontribuisaun ida ne’ebé boot tebtebes ba konsolidasaun ba ita-nia Estadu Direitu Demokrátiku no ba kreximentu ita-nia ekonomia, hodi fó asesu ba tékniku, peritu no espesialista esensiál sira ba abilitasaun no formasaun ba ita-nia rekursus umanus, iha área governativa no setór ekonomia oioin.
Jornalista : Antónia Gusmão
Editór : Cipriano Colo
