DILI, 02 agostu 2021 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins, informa tuir kalendáriu tentativa ne’ebé halo ona, katak abertura ba jogu Liga Feto Timor (LFT) sei hala’o iha loron 16 agostu ne’e.
“Ami sei hein hosi Ministériu Saúde tanba karta ami haruka ona ba sira sei estuda hela, maibé informasaun ne’ebé ami hetan sira bele autoriza ona jogu hala’o so iha adeptu ka laiha adeptu ne’e maka sei tetu, mais jogu hala’o,” Frederico Martins informa ba Agência Tatoli iha edifísiu FFTL, Dili, segunda ne’e.
LFT sei joga hosi klube hamutuk 11 kompostu hosi Primeira Divizaun no Segunda Divizaun.
Klube ne’ebé iha Primeira Divizaun mak hanesan Maranata FC, AD SLB Laulara, S’Amuser, Buibere FC no Academica FC. Enkuantu Segunda Divizaun mak hanesan, VDL FC, ASS. Baucau, São José FC, Maudoko FC, Nain Feto no UNITAL FC.
LFT ne’ebé hala’o hanesan jogu ba époka rua ona. Iha ne’ebé époka primeiru FC Buibere mak sai hanesan kampiaun ho pontu 16.
Prezidente FC Buibere, Lelia Martins hateten, Buibere prontu kualkér tempu hodi kompete iha jogu mai ne’e.
“Ami preparadu atu kompete, iha agostu nia laran karik jogu hala’o duni, jogadór ami nian preparadu,” nia hateten.
Iha sorin seluk, prezidente Maudoko FC, Taquino Soares reforsa, daudauk ne’e sira nia parte mós hein de’it bainhira jogu komesa sira ba hala’o jogu.
“Ami nia ekipa feto prontu atu ba joga, ami preparadu,” nia afirma tan.
Pra Liga Futsal sei hala’o 20 agostu
Adjuntu Sekretáriu Jerál FFTL, Frederico Martins, relata mós katak Pra Liga Futsal sei hala’o iha 20 agostu mai ne’e.
“Klube sira natoon joga ne’e mak sei joga nafatin,” nia hateten.
Klube sira joga iha Pra Liga Futsal hamutuk 24 mak hanesan, Boavista FC Timor, Baucau ALL Star, Boa Sorte FC, Becusse United, Caesardante FC, FC B’TAL, FC Beremeta, FC FIEL, FC Estrela Baguia, Crazy Horse, FC Coelho, Mau Putar FC, Kuda Ulun FC, São Francisco FC, FC Samoro, M-V D.L, Maudoko FC, Kablaki FC, Jerman FC, Santa Cruz FC, Ramelau FC no Mushila FC.
Jornalista : Hortencio Sanchez
Editór : Francisco Simões
