BAUCAU, 02 agostu 2021 (TATOLI)–Diretór Servisu Edukasaun munisipál Baucau, Augusto Hornai Ximenes, orienta ona nível ensinu hotu iha munisípiu Baucau atu halo ezame períodu dahuluk hahú ohin.
“Tuir kalendáriu edukasaun, loloos ezame períodu dahuluk hala’o iha loron 12 to’o 17 abríl, maibé tanba semana ida ka rua molok tama ezame iha munisípiu Baucau aplika serka sanitária kauza COVID-19 entaun kanseladu, tanba ne’e foin hahú ohin,” Diretór ne’e informa iha ninia knaar fatin, segunda ne’e.
Notísia relevante: Governu hakotu Serka Sanitária iha Baucau, mantein Dili loron hitu
Servisu edukasaun munisipál antes ne’e orienta ba ensinu hotu atu halo revizaun matéria hirak ne’ebé distribui ona hosi profesór ba estudante molok realiza ezame períodu dahuluk.
Suspensaun aula prezensiál hahú hosi loron 15 marsu to’o 15 jullu, tanba ne’e Unidade Nasionál Kurríkulu ne’ebé responsável ba ezame períodu fó sai sirkulár atu altera iha nível nasionál ezame períodu daruak ne’ebé tuir loloos hahú ohin.
Nune’e mos, Diresaun Jerál Ensinu fó sai sikular númeru 99, ba Unidade Nasionál Kuríkulu kona-ba alterasaun kalendáriu provas no avaliasaun períodu dahuluk, ne’ebé hahú ohin loron 02 agostu to’o 07 agostu eskola sira iha munisípiu Baucau halo ezame atubele hetan notas ba períodu dahuluk.
“Eskola sira ne’ebé reativa ona, hala’o ona ezame no daudaun ne’e kontinua hala’o prosesu aprendizajen liuhosi aula prezensiál,” nia akresenta.
Enkuantu, ezame períodu daruak, Servisu Edukasaun munisipál sei hein sikulár foun hosi Unidade Nasionál Kuríkulu no Diresaun Jerál Ensinu.
“Nível ensinu hotu ita orienta ba sira, ne’ebé iha situasaun serka sanitária seidauk konsege no labele hala’o ezame online,” nia hatutan.
Totál númeru eskola, hahú hosi pre-eskolár to’o sekundáriu hamutuk 243, kompostu hosi pre-eskolar 30, ensinu báziku sekundáriu 185, ensinu sekundáriu jerál 23 no tékniku vokasionál hamutuk lima.
Totál estudante hahú hosi ensinu pre-eskolár to’o ensinu sekundáriu hamutuk 41.255 hosi profesór hamutuk 2.200 resin.
Jornalista : Natalino Belo
Editora : Julia Chatarina
