DILI, 02 agostu 2021 (TATOLI)-Forum Organizasaun Naun Governamentál Timor-Leste (FONGTIL) sujere ba Governu atu utiliza uluk Aeroportu internasionál Oé-Cusse Ambeno “Rota do Sândalo” ho Aeroportu Internasionál Suai-Covalima, Komandante Ein-Xefe FALINTIL, Kay Rala Xanana Gusmão, molok halo konstrusaun ba Aeroportu Internasionál Prezidente Nicolau Lobato, Comoro, Dili.
Notísia Relevante : Konstrusaun Aeroportu Nicolau Lobato, abitante afetadu-sira diálogu ho Governu
Koordenadór Advokasia FONGTIL, Ivo Colimau Lay, hato’o kestaun ne’e relasiona ho planu Governu nian atu muda komunidade afetadu aldeia haat iha Suku Madohi, Postu Administrativu Don Aleixu, Munisípiu Dili, ba planu konstrusaun Aeroportu Internasionál Prezidente Nicolau Lobato iha tinan foun 2022.
“Ha’u rekoñese katak planu Governu nian atu halo konstrusaun ba Aeroportu Internasionál Prezidente Nicolau Lobato ne’e tenke realiza tanba dezenvolvimentu ne’e ba nasaun nian, maibé daudaun ne’e ita iha situasaun pandemia COVID-19, tanbasá ita la utiliza uluk Aeroportu rua hanesan Oé-Cusse no Suai,” Ivo Colimau Lay hato’o preokupasaun ne’e bainhira partisipa diálogu entre Governu no komunidade iha Suku Madohi, Dili, segunda ne’e.
Nia dehan, maske Governu prontu hodi fó indemnizasaun ba komunidade afetadu, maibé iha situasaun pandemia COVID-19 sei hasusar liután ba komunidade hodi buka fatin foun atu hela.
Nia dehan, Governu tenke fó espasu ba komunidade buka uluk fatin hodi garante katak sira bele sai ona mak Governu foin haruka sira sai, tanba daudaun ne’e iha kapitál Dili rai mamuk arraska ona.
Hatán ba kestaun Diretór Jerál Desentralizasaun Administrativu, Ministériu Administrasaun Estatál, Belarmino Filomeno Neves, hateten antes Governu liuhosi autoridade lokál halo sensibilizasaun kona-ba planu konstrusaun aeroportu refere hodi fó opsaun rua ba komunidade hodi hili mak hanesan rekuperasaun ka realokasaun.
Liuhosi sensibilizasaun ne’e komunidade afetadu sira rasik mak hili opsaun rekuperasaun, fó osan ba sira mak buka rasik fatin, nune’e Governu mós la’o tuir ida-ne’e.
Kona-bá indemnizasaun, Belarmino Filomeno Neves, laiha problema no daudaun ne’e iha hela prosesu identifikasaun kona-bá presu rekursu sira hanesan, rai, uma no ai-horis, tanba to’o agora seidauk iha presu loloos ba rekursu sira-ne’e.
Jornalista : Arminda Fonseca
Editór : Francisco Simões
