DILI, 02 agostu 2021 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins, informa rejistrasaun ba jogu tolu Kopa FFTL, Liga Futeból Timor-Leste (LFTL) no Tasa 12 de Novembru, hala’o dala ida de’it hahú 12 jullu termina 12 agostu. Tanba ne’e, klube ne’ebé kompleta ona dokumentu hodi halo rejistrasaun foin Lalenok United FC.
“Klube ne’ebé mai halo kompletu sira-nia dokumentu mak Lalenok, mais klube sira seluk ami kontaktu ba sira dehan dokumentu sira nian kompletu ona antes ne’e hatama ona iha LFTL, se nune’e ami sei haree fali buat hotu loos ona, ami avansa ba jogu,” Frederico hateten hodi responde ba Agência Tatoli iha edifísiu FFTL, Dili, segunda ne’e.
Tuir oráriu jogu sei abertura iha 20 agostu mai ne’e no loron 14 agostu mak foin dada sorteiu hodi hatene klube ne’ebé mak sei hasoru malu iha abertura ne’e.
Klube ne’ebé iha direitu absoluta partisipa iha jogu tolu ne’e mak klube hirak ne’ebé antes ne’e hamahan an iha LFTL nia okos kompostu hosi Primeira Divizaun no Segunda Divizaun.
Klube Primeira Divizaun mak hanesan, Karketu Dili FC, Boavista FC Timor, AD SLB Laulara, Lalenok United FC, Aitana FC, DIT FC, AS Ponta Leste no Assalam FC. Enkuantu Segunda Divizaun mak hanesan, Kablaki FC, Atletico Ultramar, Porto Taibessi FC, Sporting Clube de Timor, Zebra FC, FIEL FC, Academica FC no Emanuel FC.
Iha soin seluk, Prezidente klube FIEL, José da Conceição hateten, prontu partisipa iha jogu ne’ebé FFTL no LFTL sei realiza iha agostu ne’e.
“Ami prontu hein jogu komesa joga ona, dokumentu ami nian iha hotu ona, ne’ebé buat hotu ami kompletu,” nia hateten
Jornalista : Hortencio Sanchez
Editór : Francisco Simões
