DILI, 02 agostu 2021 (TATOLI)—Polísia Nasionál Timor-Leste (PNTL), komandu munisípiu Ermera, kontinua asegura no kontrola komunidade, atu bele kumpre nafatin regra serka sanitária no konfinamentu domisiliáriu, hodi prevene transmisaun surtu COVID-19.
“Orientasaun hosi komandu, ita garante nafatin implementasaun regra Estadu emerjénsia, ne’ebé impoin ba prevensaun COVID-19 iha munisípiu ne’e,” Komandante PNTL munisípiu Ermera, Superintendente, Ludgério Lay, hateten ba jornalista Agência Tatoli, via telefónika, segunda ne’e.
Notísia relevante:Governu impoin konfinamentu domisiliáriu jerál iha postu administrativu rua iha Ermera
Komandu mós estabelese postu seguransa tolu iha pontu entrada ne’ebé atu bele kontrola komunidade tama no sai hosi munisípiu ne’e, destaka mós membru iha kada postu ema na’in-lima to’o hitu, atu kontrola movimentu sidadaun.
Alende ne’e, halo patrullamentu rutina hodi sensibiliza regra saúde públika ba prevensaun COVID-19 hanesan fase liman, uza máskara, distánsia fizíku no hakmatek iha uma.
Iha 30 jullu 2021, Governu liuhosi reuniaun Konsellu Ministru (KM), deside impoin konfinamentu domisiliáriu jerál iha postu administrativu Railaku no Emera, munisípiu Ermera, hahú tuku 00:00 loron 31 fulan-jullu to’o tuku 23:59 loron 11 fulan-agostu 2021.
Desizaun ne’e, KM foti hafoin analiza aprezentasaun kona-bá pontu situasaun epidemiolójika nasionál iha munisípiu Ermera, hosi Sala Situasaun Sentru Integradu Jestaun Krize (SIJK), tanba evolusaun hosi epidémika ne’ebé agrava liu ho númeru kazu COVID-19 sa’e makás.
Notísia relevante:PNTL detein OM ‘baku’ diretór serbisu saúde Ermera
Jornalista: Nelson de Sousa
Editór: Cipriano Colo
