DILI, 02 agostu (TATOLI)–Ministru Finansa (MF), Rui Augusto Gomes, hateten, parte Governu sei submete hikas Dekretu-Lei ba Prezidente Repúblika (PR), Francisco Guterres ‘Lú Olo’, kona-ba traballadór iha administrasaun públika ne’ebé hala’o atividade profisionál ho kondisaun direta iha servisu prevensaun no kontrola COVID-19, ne’ebé konsidera hanesan liña frente.
“Dekretu-Lei ne’e daudaun iha hela diskusaun nia-laran hafoin hahú halo pagamentu, loos duni Prezidente Repúblika veta, tanba ne’e ami halo fali diskusaun,” Ministru Rui Augusto, dehan, hafoin ramata reuniaun ho Primeiru-Ministru, Taur Matan Ruak, iha Rezidénsia ofisiál Farol, segunda ne’e.
MF sei halo diskusaun atu hadi’a redasaun finál lejizlasaun ne’e hafoin lori hikas ba reuniaun Konsellu Ministru hodi hetan apresiasaun no aprovasaun hosi ezekutivu sira, hafoin lori ba Xefe Estadu.
Kona-ba pedidu PR atu uza dekretu-lei anteriór hodi halo pagamentu, governante ne’e dehan daudaun ne’e jurista sira sei halo diskusaun.
“Atu dehan sei iha dalan atu selu liña frente sira, direitu ema sei la lakon, tanba ne’e ami haree hela no tempu badak sei lori ba Konsellu Ministru,” nia akresenta.
Notísia relevante: PR husu Governu uza dekretu-lei tuan halo pagamentu ba liña frente
Antes ne’e, Governu liuhosi reuniaun Konsellu Ministru aprova dekretu-lei ba inisiativa ne’e, ne’ebé sei prodúz efeitu hahú iha loron 01 abríl 2021.
Maski nune’e, PR Lú Olo, veta lejizlasaun ne’e no husu Governu uza dekretu-lei anteriór hodi selu pesoál liña frente.
Notísia relevante: Governu Aprova Suplementu Remuneratóriu ba Profesionál Liña Frente Kada Loron $25
Iha tinan kotuk, Governu estabelese ona suplementu remuneratóriu ba traballadór elijível ho prestasaun atividade profisionál iha servisu prevensaun no kontrola COVID-19, hanesan médiku, forsa, polísia, tékniku eletrisidade, jornalista no seluk tan, ho remunerasaun la hanesan, depende ba risku servisu ne’e rasik.
Jornalista : Antónia Gusmão
Editora : Julia Chatarina
