DILI, 03 agostu 2021 (TATOLI)—Kazu pozitivu hahú aumenta makás iha munisípiu Ermera, hahú kedan 24 jullu 2021 to’o 03 agostu kazu ativu hamutuk 588 (54,2%).
“Evolusaun surtu COVID-19 iha Munisípiu Ermera durante semana rua ikus, kazu pozitivu hahú aumenta makás. To’o ohin, iha kazu ativu hamutuk 588 (54,2%) hosi totál kazu ativu nasionál,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.
Notísia relevante:COVID-19, pozitivu 118 no ativu 1.084
Hosi kazu foun ne’ebé relata ohin iha Ermera, 30 (46,2%) mak sintomátiku ka hatudu sintomas.
Munisípiu Ermera ninia kobertura vasina, to’o ohin dader tuku 10:00, 13,2% de’it ba doze dahuluk no doze daruak 1,4% de’it.
“Kobertura ida-ne’e mak ki’ik-liu ona entre munisípiu hotu-hotu, iha Timor-Leste laran tomak,” nia informa.
To’o ohin, kazu foun 118 maihosi Dili 13, Ermera ema na’in 65 no munisípiu seluk hamutuk na’in 40 ne’ebé kompostu hosi mane 73 no feto 45.
Jornalista: Felicidade Ximenes
Editór: Cipriano Colo
