MANUFAHI, 04 agostu 2021 (TATOLI)—Bebé ida konsideradu saudável bainhira inan isin-rua kumpre pontu lima nu’udár padraun universál, durante bebé sei iha inan-nia kanotak, to’o bebé moris.
Pontu lima ne’e mak hanesan, dahuluk inan tenki ba konsulta durante inan sira isin-rua, daruak tenki partus iha fasilidade saúde, datoluk bebé nia gráfika tenki sa’e tuir dezenvolvimentu imunidade, dahaat bebé tenki vasina kompletu, no dalimak tenki fó susu bebé ho eskluzivu, katak la fó han, la fó hemu buat seluk, maibé tenki fó duni inan nia susu been rasik.
Diretora Programa Saúde Inan no Oan iha Fundasaun Alola, Jesuina Maria Boavida Ximenes, hateten lia hirak-ne’e ba jornalista Agência Tatoli, iha postu saúde Betano, postu adminsitrativu Same, munisípiu Manufahi, kuarta ne’e.
Notísia relevante:Populasaun suku Betano 75% simu ona vasina
Jesuina Maria Boavida Ximenes, esplika padraun universál ne’e Fundasaun Alola utiliza iha atividade selebrasaun semana susu been inan, ne’ebé hala’o iha munisípiu Manufahi, atu bele identifika bebé saudável.
“Atividade ne’e atu promove susu been inan no susu been eskluzivu ba bebé durante fulan neen no fó susu to’o tinan rua,” nia hateten.
Atividade ne’e Fundasaun Alola hala’o iha munisípiu ne’e, ba suku haat hanesan Daisua, Betano, Holarua no Letefoho tanba ho fundu ne’ebé maihosi Gabinete Apoiu Sosiedade Sivíl.
Iha fatin hanesan Koordenadór Gabinete Apoiu Sosiedade Sivíl, Filipe da Costa, hateten susu been inan nian importante ba bebé foin moris.
Tanba ne’e, nia dehan, inan sira-nia papél atu tau matan ba bebé liu hosi fó susu been eskluzivu importante, nune’e bebé saudável.
“Ho ida ne’e mak Governu apoia fundu liuhosi Gabinete ne’e ba Fundasaun Alola,” nia hateten.
Filipe da Costa mós konsidera programa ida-ne’e bainhira iha valór, tenki hetan partisipasaun másimu hosi inan-sira no fó susu been eskluzivu hahú bebé foin moris no fó aihan nutrisaun ba oan sira.
Jornalista: Felicidade Ximenes
Editór: Cipriano Colo
