DILI, 04 Agostu 2021 (TATOLI)—Koordenadora Sentru Formasaun Sekretariadu Computer Balide (CFSC-sigla portugés), Irman Ivonia Belo, hateten sentru ne’e simu ona karta hosi Sekretaria Estadu Formasaun Profisionál no Empregu(SEFOPE) atu reativa atividade formasaun ba formandu sira iha 2021.
“Ligadu ho situasaun pandemia COVID-19, ne’ebé ita hasoru iha tinan kotuk to’o mai agora, halo atividade hotu paradu. Nune’e, iha fulan-jullu foin daudaun ne’e, ami simu karta ida hosi SEFOPE husu ami atu hahú atividade formasaun ba formandu sira iha loron 02 fulan agostu ne’e,” Irman Ivonia Belo informa ba Agência TATOLI, iha nia kna’ar-fatin, BalIde, Dili, kuarta ne’e.
Iha formasuan ne’e, CFSC nafatin kumpre protokolu hosi Ministériu Saúde (MS) no Organizasaun Mundiál Saúde (OMS) nian, hanesan fase liman, uza maskára no kontinua prátika distansiamentu sosiál, hodi prevene propagasaun surtu COVID-19.
Totál formandu sira-ne’ebé tuir formasaun ba 2021 hamutuk na’in-45 hodi tuir formasaun iha área Administrasaun Nível I no II ho matéria administrasaun no finansa, Komunikasaun, rekursu umanu, custumer sevice, lian Tétun, portugués, inglés, esperiénsia serbisu, no komputadór.
Nia esplika, formasaun ba administrasaun nian aprende kona-bá oinsá bele arquiva karta, oinsá bele halo karta, oinsá hasai minuta no ajenda sira.
CFSC Balide ne’e estabelese iha tinan 2002 no akreditada ona hosi Institutu Nasionál Dezenvolvimentu Mão de Obra (INDMO) iha tinan 2016.
Sentru formasaun refere funda hosi Madre Salesiana (FMA), ho objetivu atu tulun foinsa’e sira hodi bele hadi’a di’ak liután sira-nia moris iha futuru, tanba juventude barak ne’ebé ramata ona eskola sekundáriu maibé labele kontinua ba estudu iha universitáriu.
Totál formandu ne’ebé tuir ona formasaun iha CFSC hamutuk 900-resin, hosi númeru ne’e 70% mak hetan ona serbisu iha Instituisaun Estadu no Organizasaun Naun Govermentál (NGO) sira.
Enkuantu, totál funsionáriu no formadora hamutuk na’in-sia (9) no hosi númeru ne’e funsionáriu na’in-ida (1) no formadóra na’in–ualu (8).
Jornalista : Nelia Fernandes
Editór : Cancio Ximenes
