OÉ-CUSSE, 04 agostu 2021 (TATOLI)-Sekretária Rejionál ba Asuntu Edukasaun Solidaridade Sosiál, RAEOA, Avelina da Costa hateten estudante hamutuk ema na’in 47 maka selesiona husi Fundus Dezenvolvimentu Kapitál Umanu ba programa bolsa hakbiit hodi kontinua sira-nia estudu iha universidade privada no públiku iha rai-laran durante 2021.
“Ita-nia kandidatu bolseru na’in 47 iha Oé-Cusse mak hetan oportunidade ba bolseiru hakbiit FDCH,” Avelina da Costa dehan asuntu ne’e ba jornalista TATOLI, iha Santa Rosa, Pante Makasar, kuarta ne’e.
Notísia Relevante:Benefisiáriu bolsa hakbiit 410 asesu bá IESP
Antes ne’e, Rejiaun Administrativa Espesiál Oé-Cusse Ambeno submete ona lista hamutuk ema na’in 106 maka atu sai benefisiáriu ba programa ne’e, maibé estudante na’in 47 maka priense kriteria tanba família kbiit laek, inan-aman mate ona.
Tuir pedidu husi FDCH nasional ba estudante na’in 47 ne’e atu aprezenta aan iha loron 10 fulan-agostu 2021 iha nasionál. Tanba ne’e maka Sekretária Rejionál ba Asuntu Edukasaun Solidaridade Sosiál koordena hela ho pontu vokál ekipa Prevensaun no Mitigasaun COVID-19 RAEOA hodi fasilita sira-nia viajen bá Dili.
“Daudaun ne’e ita prepara sira atu bá Dili, tanba transporte maritima la halo viajen, nune’e ita sei fasilita sira liuhosi aviaun ZEESM nian iha semana oin,” nia hateten.
Entretantu bazea ba diploma Ministériál nú.9/2021, loron 10 marsu, kona-ba atribuisaun bolsa estudu ba família kbiit la’ek hodi frequenta estudu iha Universidade.
Programa ne’e la’o tanba hetan kooperasaun servisu hamutuk entre liña ministeriál kompostu husi Ministériu Ensinu Superiór Siénsia no Kultura (MESSK), Ministériu Edukasaun Juventude no Desportu RAEOA, Ministériu Solidaridade Sosiál no Inkluzaun (MSSI), no Lideransa lokál.
Entretatu, foinlalais ne’e FDCH anunsia ona rezultadu avaliasaun bolsa hakbiit ba benefisiáriu 410 asesu Instituisaun Ensinu Superiór Privadu (IESP).
Foufoun, ekipa Sekretariadu FDCH no mós Ministériu Ensinu Superiór, Siénsia no Kultura (MESSK) simu dokumentu hamutuk 1.705 maibé kandidatu ne’ebé liu iha prosesu verifikasaun dokumentu ne’e hamutuk 1.500. Depois halo verifikasaun dokumentu aprova kandidatu hamutuk 410.
Notísia Relevante:UNDIL-UNPAZ prepara simu estudante Bolsa Hakbiit
Jornalista:Abílio Elo Nini
Editór:Agapito dos Santos
