DILI, 04 agostu 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, hateten, daudaun ne’e Governu autoriza ona sé de’it bele realiza hikas atividade desportiva tanba termina ona konfinamentu domisiliáriu jerál iha Dili, maski impoin hela serka sanitária.
“Ita bele halo atividade desportiva, Governu mós enkoraja sidadaun, liuliu joven atu halo atividade desportiva atu hasa’e imunidade maibé atividade desportiva sira hanesan kampionatu ne’ebé halibur ema barak tenke evita tanba bele promove aglomerasaun ema,” Ministru Fidelis dehan iha Palásiu Governu, kuarta ne’e.
Notísia relevante: Medida ezekusaun EE da-XVI mantein regra anteriór
Daudaun ne’e, Dili aplika serka sanitária, tanba ne’e sé de’it mak atu sai hosi rejiaun ne’e no seidauk vasina kompleta, tenke submete ba teste swab, nune’e mós sira seluk atu tama-mai Dili.
Enkuantu, ba hirak ne’ebé sirkula de’it iha Dili laran, laiha limitasaun, ne’ebé bele movimenta livremente.
“Bainhira ita iha nafatin vírus ne’e, mak ita tenke ba vasina no haree ba númeru infesaun COVID-19 komesa tun daudaun ona tanba númeru vasina sa’e, entaun únika solusaun mak tenke vasina,” nia subliña.
Aleinde vasina, tenke kumpre regra hosi Organizasaun Mundiál Saúde (OMS) hanesan distansiamentu fíziku, fase liman beibeik, no uza máskara.
Jornalista : Antónia Gusmão
Editora : Julia Chatarina
