DILI, 04 agostu 2021 (TATOLI)-–Ministru Petróleu no Minerál, Víctor da Conceição Soares, konsidera planu konstrusaun terminál importasaun petróleu iha Metinaro hodi garante no asegura stock enerjétika nasionál.
“Ita hakarak asegura enerjétika nasionál tanba durante ne’e la asegura fornesimentu, ne’ebé bainhira kombustível mai ho ro-ahi, direitamente ba terminál sira, dala ruma iha ró de’it, no bainhira stock atu hotu mós ró seidauk mai, ne’ebé fó ameasa boot ba seguransa enerjétika nasionál iha Timor-Leste,” Ministru Víctór hateten ba Agência TATOLI iha ninia knaar fatin, Mandarin, kuarta ne’e.
Tanba ne’e, objetivu Governu inisia konstrusaun terminál atu garante stock enerjia nasionál ba fulan-tolu ka loron 120, ba komersializasaun hosi Timor Gás no Petróleu, Empreza Públika (Timor GAP, E.P).
“Ita-nia fornesimentu enerjia la’ós eletrisidade de’it, maibé gazoel no gazolina ba karreta sira, kombustível ba aviaun no ro-ahi sira iha tasi laran, ne’e presiza fonte enerjia,”nia akresenta.
Notísia relevante: Reuniaun KM: MPM aprezenta planu konstrusaun terminál importasaun petróleu
Planu ne’e mosu hahú hosi Governu anteriór iha tinan 2012, maibé la konsege ezekuta, nune’e VIII Governu kontinua planu ne’e.
“Ita fó resposta atubele garante, tanba ne’e Governu tenke halo terminál importasaun petróleu ne’ebé la’ós ba ida de’it maibé multi funsaun hanesan ba ró-ahi, aviaun, karreta no ba sentrál elétrika sira,” Ministru hatutan.
Tuir ezekutivu ne’e, presiza duni garante stock nasionál, nune’e iha situasaun krize polítika ruma labele fó risku ba seguransa enerjétika nasionál.
Iha tinan 2013, Governu anteriór hahú planu no estudu, nune’e Ministériu Justisa liuhosi Terra no Propriedade atribui rai ektare 186 iha aldeia Manleu, suku Wenunuk, postu administrativu Metinaro, munisípiu Dili.
Aleinde ne’e, Primeiru-Ministru, Taur Matan Ruak, fó ona orientasaun ba MPM atu fó atensaun sériu kona-ba estratéjiku sira atu Timor-Leste labele hasoru krize enerjia.
“Ha’u aprezenta ba Konsellu Ministru atu halo apresiasaun no tuir kalendáriu komesa setembru ba oin, hahú halo estudu viabilidade ekonómiku, halo planta no buka parseiru atubele halo investimentu,” nia tenik.
Daudaun ne’e, Timor GAP, E.P hahú prepara ekipa atu halo estudu viabilidade iha setembru tinan ne’e hodi implementa iha tinan 2022, no tuir planu bele halo operasaun iha tinan 2023, maibé depende ba situasaun pandemia.
Timor GAP, E.P mós posibilidade hahú halo negosiasaun ho parseiru sira atubele investe liuhosi Parseria Públika Privada (PPP) hodi la depende fundu hosi Governu.
Tanba ne’e, Governu kontinua fó apoiu polítiku ba Timor GAP, E.P atu kontinua halo investimentu hodi hatama reseita ba kofre Estadu.
Jornalista : Florêncio Miranda Ximenes
Editora : Julia Chatarina
