iklan

COVALIMA, HEADLINE, INKLUZAUN SOSIÁL, MUNISÍPIU

Komunidade Dato-Tolu agradese Governu lori Naroman ba Suku

Komunidade Dato-Tolu agradese Governu lori Naroman ba Suku

Ministru MAPKOMS, Francisco Jerónimo. inagura Sentru Informasaun iha Suku Dato-Tolu, Postu Administrativu Fohorem, Muisípiu Kovalima.

COVALIMA, 05 agostu 2021 (TATOLI) – Xefe Suku Dato-Tolu, João Agostinho Resi, agradese ba Governu tanba bele hakbesik-an ba komunidade sira iha Suku Dato-Tolu liuhosi Programa Naroman ba Suku ne’ebé organiza husi Ministériu Asuntu Parlamentár no Komunikasaun Sosiál (MAPCOMS, sigla portugés).

“Dato-Tolu sai hanesan suku espesiál ba Programa Naroman ba Suku. Há´u lori komunidade nia-naran agradese no fó obrigadu wain ba Governo, tanba desde okupasaun Indonézia to´o ukun-an, suku ida ne´e konsidera izoladu tebes iha Munisípiu Kovalima, maibé iha governasaun ida ne´e, suku ida ne’e la’ós ona izoladu maibé hahú tama ona suku dezenvolvidu”, dehan Agostinho Resi iha nia diskursu durante inagurasaun Sentru Informasaun iha Suku Dato-Tolu hosi Postu Administrativu Fohorem, Munisípiu Covalima.

Autoridade komunitária ne´e kontinua husu ba Governu sentrál atu tau konsiderasaun ba infraestrutura bázika, tanba iha suku refere seidauk asesu ba liña elétrika.

Iha fatin hanesan, Ministru Asuntu Parlamentár no Komunikasaun Sosiál, Francisco Jerónimo, hateten programa Naroman ba Suku nu´udar planu prioridade Governu atuál ne’ebé lidera husi Primeiru-Ministru, Taur Matan Ruak, ho objetivu atu lori programa Governu nian hodi hakbesik ba povu.

“Programa Naroman ba Suku la’os atu lori eletrisidade ba komunidade maibé lori naroman ba povu liuhosi informasaun kona-ba dezenvolvimentu, planu prioridade Governu no mós atu kombate informasaun laloos (hoax) iha rede sosiál”, afirma ministru ba komunidade sira iha Suku Dato-Tolu.

Ministru Jerónimo akresenta katak serimónia inagurasaun ba Sentru Informasaun iha suku ida ne´e atu promove asesu informasaun ba suku sira iha área rurál, hakbiit komunidade sira nia kapasidade asesu ba informasaun, informa ba komunidade kona-ba programa Governu atuál nian, rona komunidade sira nia preokupasaun hodi transmite ba ministériu relevante, hasa´e koñesimentu komunidade nian kona-ba prosesu implementasaun planu dezenvolvimentu suku nian.

Nune´e mós, Programa Naroman ba Suku hanesan atividade kontinuasaun ho nia prioridade sira setór komunikasaun sosiál nian, ne’ebé Governu priorotiza atu hala’o durante mandatu tinan lima, liuliu atu asegura dizeminasaun informasaun kona-ba asaun governativa hodi promove koñesimentu públiku nian ba asaun governativa ho transparénsia governasaun nian.

Serimónia ne´e hetan partisipasaun hosi Adjuntu Administradór Munisípiu Covalima, Afonso Nogueira Nahak, Komandante Polísia Munisípiu Covalima, Superintendente, António Maria de Sá, Komunidade Unidade Polísia Fronteira (UPF), Kompañia Bravo, Inspetór Polísia, Lino Pina de Jesus, Prezidente Konsellu Diretivu Ajénsia TATOLI, Manuel Pinto, veteranu sira, reprezentante relizioju, estudante no komunidade.

Suku Dato-Tolu kompostu hosi Aldeia Natardik, Fatuk Kabuar Kraik, Fatuk Kabuar Leten. Ho totál populasaun hamutuk 1.600 resin.

Programa Naroman ba suku estabelese desde 2018 no daudaun ne´e kobre ona munisípiu sira hanesan Lautém, Baukau, Bobonaru, Likisá, Aileu, Manufahi no Kovalima.

Jornalista: Afonso do Rosário

Editór: Zezito Silva

iklan
iklan

Leave a Reply

iklan
error: Content is protected !!