DILI, 06 agostu 2021 (TATOLI)-Ministru Ensinu Superiór, Siénsia no Kultura (MESSK), Longuinhos dos Santos, deside ona atu ensinu superiór sira bele hahú re-ativa aula prezensiál iha loron 09 agostu 2021.
Ministru Longuinhos dos Santos, argumenta katak MESSK deside re-ativa aula prezensiál ba ensinu superiór tanba bazeia ba reuniaun konsellu reitór ne’ebé hala’o iha loron 29 jullu 2021, ko’alia kona-ba re-ativa aula prezensiál ba ensinu superiór sira.
“Tuir sirkulár ne’ebé fó ona, katak iha loron 09 agostu 2021, ita hahú ona re-ativa aula prezensiál ba ensinu superiór sira, exeptu Munisí Ermera iha hela konfinamentu obrigatóriu,” Longuinhos dos Santos informa ba Agência Tatoli iha nia knaar fatin, sesta ne’e.
Maske semana oin ensinu superiór sira re-ativa fali ona aula prezensiál, maibé kada ensinu superiór sira tuir nafatin protokolu saúde públiku kona-bá prevensaun COVID-19 nian, hanesan hanesan, uza máskara, distánsia sosiál no kontinua nafatin fó vasinasaun ba estudante-sira ho funsionáriu no dosente sira ne’ebé mak seidauk kompleta vasina.
Jornalista : Arminda Fonseca
Editór : Francisco Simões
