Vasina, Governu hala’o kampaña intensiva iha munisípiu tolu

DILI, 06 agostu 2021 (TATOLI)—Governu liuhosi Komisaun Interministeriál ba Implementasaun vasina COVID-19 iha Timor-Leste, halo ona kampaña intensiva iha munisípiu tolu mak hanesan, Bobonaro, Covalima no Rejiaun Administrativa Espesiál Oe-cusse Ambeno (RAEOA).

“Ita halo ona kampaña intensiva ba vasinasaun iha munisípiu tolu hahú 02 agostu to’o ohin munisípiu Bobonaro  iha ema  na’in  14.007 ka 25% mak simu ona doze dahuluk. Covalima iha na’in  20.948 ka 52,1%, RAEOA na’in 17.836 ka 40,6%,” Portavós Komisaun  Interministeriál, Danina Coelho, hateten iha salaun MSSI, Caicoli, sesta ne’e.

Notísia relevante:MS re-ativa vasina COVID-19 iha Lour

Alende ne’e, iha munisípiu Bobonaro ema ne’ebé simu ona vasina doze daruak  hamutuk 1.691 ka 3,0%, Covalima 1.266 ka 3,5% no RAEOA  na’in  1.713 ka 4,0%.

Komisaun Interministeriál atu fornese vasina COVID-19 liuhosi kampaña intensiva iha munisípiu-sira, iha semana tuir-mai, estende ba iha munisípiu Ermera.

Ministériu Saúde mós aumenta ona númeru vasinadór iha nível munisipál, fasiliade saúde no mós pesoál saúde treinadu adisionál iha kada munisípiu atu bele suporta ba kampaña intensiva ne’e hodi asegura katak, ema barak mak sei simu vasina COVID-19 no sei hetan protesaun hasoru impaktu grave liuhosi moras COVID-19.

Sidadaun ne’ebé mak iha munisípiu Dili simu ona vasina doze dahuluk hamutuk 144.328 (67,5%) no simu ona doze daruak hamutuk 93.437 (43,7%).

Munisípiu 12  ne’ebé simu ona avsina doze dahuluk hamutuk 167.020 (30,9%) no doze daruak  hamutuk 14.684 (2,7%).

Governu simu ona vasina adisionál  hosi Governu Austrália hamutuk doze 277.850,  hosi Covax Facility  doze 124.800,  Governu Xina hamutuk  doze 100.000,  Governu Portugál doze 12.000 no totál  doasaun hamutuk doze 514.650 .

To’o ohin, Timor-Leste rejista ona kazu konfirmadu COVID-19 hamutuk 11.225 no na’in 26 mak mate ona.

Jornalista: Felicidade Ximenes

Editór: Cipriano Colo