BAUCAU, 06 agostu 2021 (TATOLI)–Vise-Ministru Edukasaun Juventude ho Desportu (MEJD), António Guterres, husu profesór sira kolabora hodi kria unidade atu re-organiza ensinu aprendizajen, nune’e bele la’o efetivu no efikásia.
“Husu nafatin alerta tuir vasina atu prosesu aprendizajen bele la’o ho di’ak no iha tempu hanesan apela ba profesór hotu atu fó liman kolabora hamutuk no hametin nafatin unidade tanba edukasaun nu’udar matadalan ba dezenvolvementu,” Vise-ministru hateten iha Eskola Ensinu Baziku Sentrál númeru 01 Tirilolo, Baucau, sesta ne’e.
Nia dehan, maski situasaun difísil tanba pandemia, maibé ho espíritu tomak no domin ba rai maka sei la sura kolen ba malu.
“Importante ita bele kontribui nune’e sei husik hela istória ba oan sira ne’ebé sei hala’o estudu, ha’u husu kolabora hosi kiik-oan kedan, hahú hosi pre-eskolar to’o ensinu báziku,” António Guterres akresenta.
Nune’e, Vise-Ministru apela ba inan-aman no profesór sira atu servisu hamutuk durante prosesu aprendizajen no prevensaun COVID-19
MEJD rasik daudaun ne’e hahú prepara tama faze ezame períodu daruak bazeia ba kalendáriu eskolár.
Notísia relevante: Governu hakotu Serka Sanitária iha Baucau, mantein Dili loron hitu
Munisípiu Baucau foin finaliza ezame períodu dahuluk tanba foin termina serka sanitária, nune’e tuir sirkulár ne’ebé fó sai hosi ministériu rasik, iha pontu importante ba munisípiu sira hanesan, bainhira laiha serka sanitária nafatin la’o tuir kalendáriu ezame eskolár.
Enkuantu, munisípiu Ermera bainhira termina serka sanitária mak foin organiza ezame, maibé munisípiu Viqueque, Baucau no Dili sei fó flexibilidade tuir kondisaun.
“Baucau sei haree tanba evolusaun COVID-19, dalaruma sei husu atu aumenta to’o loron 11 setembru hodi rekupera matéria nune’e bele realiza ezame períodu daruak nian ho di’ak,” governante ne’e hatutan.
Munisípiu Baucau reativa hikas aula prezensiál iha loron 15 jullu no ezame períodu dahuluk hahú daudaun no sei ramata iha loron 07 agostu, nune’e posibilidade ezame períodu daruak sei realiza iha setembru hafoin evaluasaun matéria.
Jornalista : Natalino Belo
Editora : Julia Chatarina
