OÉ-CUSSE, 06 agostu 2021 (TATOLI)-Vise-Ministru Negósiu Estranjeiru no Kooperasaun (MNEK) hamutuk ho Prezidente Autoridade (PA) Rejiaun Administrativa Espesiál Oé-Cusse Ambenu (RAEOA), sesta ne’e inaugura kuarentena iha Portu Kitahara Mahata, suku Costa, sub-rejiaun Pante Makasar.
Vise-MNEK, Julião da Silva, iha ninia diskursu agradese ba autoridade RAEOA, tanba prepara ona fasilidade saúde ba Atoni-aon sira iha ámbitu Covid-19.
“Governu sentrál preokupa tebes ho Oé-Cusse, tanba hela iha fronteira ne’ebé haleu hosi nasaun viziñu, maibé autoridade sira iha ne’e ho esforsu tomak prepara kondisaun saúde no ita haree Oé-Cusse prepara di’akliu Dili, tanba ne’e agradese ba Prezidente Autoridade”, Governante ne’e haktuir iha serimonia inaugurasaun ne’e.
Governante ne’e dehan, kuarentena hanesan kondisaun de’it, maibé importante liu ba ema hothotu atu kumpre regra ne’ebé Estadu estabelese ona, no mós hakbesik án ba sentru saúde sira hodi hetan vasina.
Prezidente Autoridade RAEOA, Arsénio Paixão Bano, hatete Oé-Cusse iha estratejia rasik atu prepara kondisaun ba povu iha situasaun Estadu emerjénsia no serka sanitária.
“Ohin ita simu tan obra ida kualidade no importante ba Oé-Cusse, ha’u ho autoridade sira hakarak prepara uluk kondisaun atu hasoru situasaun saida de’it, tanba Oé-Cusse rai ketan”, katak nia.
Nia hatutan: “Lakohi buat hot-hotu ita depende iha nasionál, ne’e kleur, maibé ita tenki prepara-án iha situasaun ida hanesan ne’e”.
Autoridade ne’e hatete, iha 2021 RAEOA prepara fasilidade saúde iha fatin neen, sub-rejiaun haat. Bainhira Covid-19 laiha ona maka autoridade sei uza fali ba fasilidade saúde permanente.
Kuarentena hamutuk fatin neen iha sub-rejiaun sira maka hanesan, sub-rejiaun Pante Makasar konstrui iha fatin Tolu, kuarentena Sakato iha suku Nipani futuru sei uza ba izolamentu ba moras hada’et hanesan TBC, Lepra no seluktan.
Kuarentena Kiumaonteko iha suku Costa, futuru sei uza ba sentru saúde zona sentrál Pante Makasar. Kuarentena Portu Kitahara Mahara, futuru sei uza ba fatin feira ba promove prudutu lokál.
Kuarentena iha sub-rejiaun Oé-Silo konstrui iha Suku Bobometo, futuru sei uza ba sentru internamentu ba inan isin rua bainhira partus. Kuarentena iha sub-rejiaun Pasabe iha suku Abani, futuru sei sai sentru internamentu ba inan isin rua bainhira partus, no ikus mak kuarentena iha sub-rejiaun Nitibe iha suku Bene-Ufe, futuru sei sai sentru saúde Nitibe.
Kuarentena ne’e konstrui hosi empreza Lifau-Inda Unipsoál,Lda. Kuarentena ne’e fahe ba uma tolu kada uma nia medida; naruk metru 52×10 ho durasaun kontratu durante fulan rua, ho nia fasilidade kuarto 48, bele akumula ema na’in 192, ho kustu totál $407.000.
Jornalista : Abílio Elo Nini
Editór : Cancio Ximenes
