DILI, 08 agostu 2021 (TATOLI)–Sekretariu Jeral Klube Primeira Divizaun Liga Futeból Timor-Leste (LFTL) Karketu Dili FC, Elizeu Isaac, hateten sira-nia parte prontu partisipa iha jogu tolu ne’ebé organiza hosi Federasaun Futeból Futeból Timor-Leste (FFTL) no LFTL iha époka 2021.
Notísia Relevante: LFTL seidauk iha orsamentu hala’o atividade
“Ami prepara hela atu partisipa iha Kopa FFTL, Liga no tasa 12 de Novembru ne’ebé agora prepara hela. Maibé ami sei hein hela konvite ida hosi FFTL no Liga atu ami enkontru hamutuk. Atu dehan de’it, ami prontu hela,” Elizeu Isaac hateten ba Agéncia Tatoli iha Dili, domingu ne’e.
Iha époka ne’e, nia dehan, Klube Karketu sei mantein nafatin ho jogadór anterior hodi reforsa nafatin klube refere tanba jogadór hirak ne’e nia parte kontaktu hotu ona. Maske iha hanoin atu aumenta jogadór foun balun maibé nia parte sei haree no tetu hela.
Tuir nia, jogadór sira iha Klube Karketu prontu atu partisipa iha jogu ne’e tanba simu hotu ona vasina tuir regra ne’ebé haktuir hosi FFTL-LFTL katak jogadór hotu tenke vasina mak foin bele partisipa iha jogu ne’ebé sei hala’o agostu nia laran ne’e.
“Atu hatete de’it ba públiku katak ami nia jogadór hotu vasina ona. Estrutura mós vasina ona. Regra hotu ami prenxe hotu ona,” nia dehan.
Enkuantu tuir orariu tentativa ne’ebé fó sai ona katak jogu sei hala’o iha 20 agostu 2021 iha Estádiu Munisipál Dili, no 14 agostu sei dada rifa ba klube 20 ne’ebé hamahon an iha LFTL durante ne’e.
Klube ne’ebé iha direitu absoluta partisipa iha jogu tolu ne’e mak klube hirak ne’ebé antes ne’e hamahan on iha LFTL nia okos kompostu hosi Primeira Divizaun no Segunda Divizaun.
Klube Primeira Divizaun mak hanesan, Karketu Dili FC, Boavista FC Timor, AD SLB Laulara, Lalenok United FC, Aitana FC, DIT FC, AS Ponta Leste no Assalam FC. Enkuantu Segunda Divizaun mak hanesan, Kablaki FC, Atletico Ultramar, Porto Taibessi FC, Sporting Clube de Timor, Zebra FC, FIEL FC, Academica FC no Emanuel FC.
Jornalista : Hortencio Sanchez
Editór : Cancio Ximenes
