iklan

EKONOMIA, HEADLINE

Aban, Governu submete hikas dekretu-lei suplementu remuneratóriu ba PR

Aban, Governu submete hikas dekretu-lei suplementu remuneratóriu ba PR

Membru Governu no Deputadu sira halo debate konfirmasaun deklarasaun Estadu Emerjénsia, iha sala plenária Parlamentu Nasionál, tersa (10/08). Imajen TATOLI/Egas Cristóvão

DILI, 10 agostu 2021 (TATOLI)-Governu sei submete hikas alterasaun daruak Dekretu-Lei númeru 17/2020, loron 30 abríl, ba Prezidente Repúblika, Francisco Guterres ‘Lú Olo’, hafoin veta ho husu Governu uza lejizlasaun anteriór hodi nafatin halo pagamentu ba liña frente.

Dekretu-Lei ne’e kria suplementu remuneratóriu ba funsionáriu, ajente no traballadór administrasaun públika, ne’ebe halo atividade profisionál iha servisu prevensaun ka kontrola COVID-19 iha kondisaun direta.

“Governu halo ona alterasaun daruak Dekretu-Lei númeru 17/2020, ne’ebé aprova ona iha Konsellu Ministru, ne’ebé aban dadeer (11/08) sei haruka ba Gabinete Prezidente Repúblika,” Ministru Finansa (MF), Rui Augusto Gomes, hateten durante debate votu konfirmasaun pedidu deklarasaun Estadu Emerjénsia, iha sala plenária, Parlementu Nasionál (PN), tersa ne’e.

Notísia relevante: PR husu Governu uza dekretu-lei tuan halo pagamentu ba liña frente

Ministru hato’o kestaun ne’e hodi responde ba preokupasaun Deputadu sira iha PN, ne’ebé husu Governu presiza responde lalais suplementu remuneratóriu ba liña frente sira ne’ebé luta kombate COVID-19 iha Timor-Leste.

Antes ne’e, Konsellu Ministru define ona valór suplementu remuneratóriu variante entre $5 to’o $25 kada loron, tuir risku ne’ebé benefisiáriu sira hasoru.

Notísia relevante: Governu aprova suplementu remuneratóriu ba linã frente $5-$25 kada loron

Alterasaun ne’e simplifika lista kategoria benefisiáriu, ne’ebé antes ne’e ho definisaun luan tebes.

Enkuantu, alterasaun ne’ebé prevee iha diploma ne’e sei prodúz efeitu hahú husi loron 30 abríl 2020.

Direitu ba sumplementu sei prolonga to’o loron 31 dezembru 2021, sein prejuizu ba posibilidade posteiór hodi halo estensaun liuhosi intervensaun lejizlativa foun.

Jornalista : Florêncio Miranda Ximenes

Editora     : Julia Chatarina

iklan
iklan

One Comment

  1. Boaterde ba : Exellencia, Distintu e Membru Gov. Iha Pais hotu2 iha mundu nee Nia funcionario nebe foo ona nian aan Hodi servico ba moras oin2 no surtu hanesan COVId 19, Gov. Tau atensaun no foo Nia deritu sira nebe gov. rasik promete ona. Mais contrariu iha ita Nia Nasaun doben Timor Leste oin seluk fali. Professional saude ou Lina Frenti sira halo Nia servico la hatene kolen, COVId 19 Mo’s Tama nafatin Servco mais atu foo deit osan oan nebe sira promete nee ate data Mo’s sedauk realiza paganentu nee deit tamba sa ? Ita. Nia rain buat hirak nee akontese hanesan !

Leave a Reply

iklan
error: Content is protected !!