OÉ-CUSSE, 10 agostu 2021 (TATOLI)–Autoridade Rejiaun Administrativa Espesiál Oé-Cusse Ambeno (RAEOA), tersa ne’e, hasai ona sirkulár ho númeru 146/DEJD-ZEESM TL/VIII/2021 hodi suspende hikas prosesu aprendizajen ba estudante sira hahú husi nivél ensinu pre-eskolár to’o ensinu sekundária.
“Desizaun ne’e ita fó sai tanba hare hosi kazu númeru COVID-19 Oé-Cusse kada loron aumenta beibeik, ita hare én-jerál ita tauk mak estudante sira kuando virus ne’e da’et ona ba eskola sira, ita susar atu prevene tanba ne’e mak ita suspende kuando situasaun normál mak foin re-ativa fali,” Diretór Edukasaun RAEOA, Daniel Mauno fó-sai ba jornalista Agência Tatoli iha Santa Rosa, Pante Makasar, tersa ne’e.
Desizaun ne’e, nia dehan, ladun afeta ba estudante sira tanba antes ne’e RAEOA realiza ona ezame periodu daruak no tama ona iha faze koresaun materia ezame husi profesór sira.
“Profesór sira maka sei halo koresaun ba rezultadu ezame nian iha uma de’it,” nia hateten.
Iha sirkulár ne’e mós husu ba profesór, estudante no sidadaun baibain atu kumpre protokolu saúde nian ne’ebé estabelesidu maka fase liman beibeik ho sabaun no bee moos, uza máskara ho loloos, mantein distansia fíziku mazumenus metro 1.5, hakmatek iha uma, no labele halo tranzaksaun ilegál iha fronteira entre Indonézia no Timor-Leste.
Iha fatin seluk, Diretór Eskola Bázika Sentrál (EBC) Um de Maio Palaban, Vincencio Cono, hateten desizaun ne’e, importante atu fó apoiu ba autoridade rejionál Oé-Cusse hodi halo prevensaun ba transmisaun Covid-19.
Entretantu, totál kazu Covid-19 pozitivu iha RAEOA to’o ohin hamutuk ema na’in 39 ne’ebé oras ne’e izola hela iha sala izolamentu Portu Kitahara Mahata.
Jornalista:Abílio Elo Nini
Editór: Agapito dos Santos
