OÉ-CUSSE, 11 agostu 2021 (TATOLI)-Autoridade Rejiaun Administrativa Espesiál Oé-Cusse Ambeno (RAEOA), kuarta ne’e, ofisiálmente hatuur fatuk-inan ba projetu konstrusaun rua, kompostu hosi Eskola Bázika Filiál (EBF) Palsam, Suku Malelat ho Eskola Tékniku Vokasionál (ETV) São João Paulo II iha suku Abani sub-rejiaun Pasabe.
“Ami kontente tanba autoridade konstrui eskola rua iha Pasabe, tanba tinan kotuk ha’u mai vizita, autoridade lokál sira iha Pasabe husu atu harii eskola no loke estrada foun, entaun tinan ne’e, ita komesa responde ona, no ohin ita hamutuk lansa primeira pedra ba konstrusaun eskola rua; ida iha Malelat no ida iha suku Abani,” prezidente autoridade RAEOA, Arsenio Paixão Bano, hateten iha nia diskursu bainhira hatuur fatuk-inan ba projetu eskola rua-ne’e.
Nia dehan, autoridade sei kontinua konstrui eskola iha sub-rejiaun sira seluk, tanba planu prioridade autoridade nian maka bee-moos, edukasaun, saúde no estrada, tanba autoridade nia hakarak tenke rezolve problema sira ne’e.
“Ha’u kontente anba suku Abani ho Malelat iha Pasabe, autoridade tau atensaun, hahú tinan kotuk xefe suku Malelat ho nia komunidade husu autoridade atu loke estrada foun hosi suku Ban-Afi, bairru Kusi liga ba suku Malelat ne’e halo tiha ona, no ohin ita mai harii eskola foun,” Arsenio Bano tenik.
Tinan kotuk, nia hatutam Pároku Pasabe husu mós no ohin komesa responde ona harii eskola foun primeira-vés loke Eskola Tékniku Vokasionál dook hosi sidade. Tanba ne’e, autoridade sei kontinua lori dezenvolvimentu seluk, hanesan perfurasaun bee-moos tenke konstrui iha tinan ne’e ba komunidade Pasabe.
Autoridade ne’e husu ba empreza sira atu konstrui obra sira ne’e tenke garante kualidade, tanba gasta osan Estadu harii fasilidade ba komunidade tenke uza ho di’ak nune’e bele fó benefísiu ba povu.
Jestór sub-rejiaun Pasabe, Anton Ulan, agradese ba autoridade tanba harii ona Eskola Sekundáriu Tékniku Vokasionál São João Paulo II, iha sub-rejiaun Pasabe ne’ebé lideradu hosi Pároku Pasabe.
“Ha’u agradese ba autoridade tanba harii ona fasilidade ba edukasaun tanba Pasabe izoladu, dook hosi kapitál Oé-Cusse, presiza tebes apoiu autoridade, maski foin loke Eskola Tékniku Vokasionál maibé ami fiar sei fó benefísiu ba povu Pasabe atu oan sira bele asesu edukasaun iha área vokasionál ne’e,” Anton Ulan hateten.
Pároku Pasabe, Padre Agusto Hermenegildo Nunes, lia-tun mós katak edukasaun importante ba sarani sira, nune’e Pároku buka dalan iha autoridade bele apoia fasilidade edukasaun ne’e iha sarani sub-rejiaun Pasabe.
“Ha’u hanoin pároku Pasabe atu ba oin di’ak liután presiza mós edukasaun, tanba ne’e ita buka meius oinsá bele loke eskola ETV ne’e,” nia hateten/
Koordenadór Eskola Bázika Filiál Palsam, Martinho Lelan hateten, eskola EBF Palsam, tinan barak, sira triste tanba kondisaun eskola la favoravel atu realiza aprendizajen ho seguru, maibé ho apoia autoridade harii konstrusaun foun bele rezolve ona sira-nia preokupasaun.
“Eskola ne’e halo ho tali tahan de’it, sala aprendizajen rua no profesór nian ida, no kadeira ami halo rasik uza ai, ho totál estudante na’in-50 kompostu hosi primeiru-ano na’in-29 no segundu-ano na’in-21 ho totál profesór na’in-tolu permanente no na’in- kontratadu na’in-rua,” Martinho Lelan hateten.
Xefe suku Malelat, José Marques, agradese ba Maromak tanba autoridade apoiu ona loke estrada foun hosi bairru Kusi, suku Ban-Afi, sub-rejaiun Nitibe hodi asesu ba suku Malelat, sub-rejiaun Pasabe.
Projetu konstrusaun EBF Palsam konstrui hosi empreza Lorotias Unipesoál, Lda, ho valór kontratu $117,672,08. Ho nia medida konstrusaun metro 9×32 no sala aprendizajen tolu, no sala profesór ida no kaza de bañu lima, inklui kaza de baño ba defisiente ida.
Eskola Tékniku Vokasionál São João Paulo II iha suku Abani konstrui hosi empreza Neonmantaen Unipesoál, Lda, ho valór kontratu $104,817,69 ho nia medida konstrusaun metru 9×32 no sala aprendizajen tolu, sala profesór ida no kaza de bañu lima inklui kaza de bañu ba defisiente ida.
Jornalista : Abílio Elo Nini
Editor : Francisco Simões
