BAUCAU, 11 agostu 2021 (TATOLI)—Diretór Diresaun Transporte munisípiu Baucau, Roberto da Cruz, hateten, parte diresaun rekolla reseita hamutuk $23.145 hosi atendimentu ema hamutuk 1.787 iha fulan-jullu nia laran.
“Hosi osan ne’e fahe ba kategoria haat hanesan rejistu hamutuk $1.700, transporte públiku $6.485, karta kondusaun $1.720 no inspesaun hamutuk $13.240,” Diretór Transporte informa iha ninia knaar fatin, Villa nova, Baucau, kuarta ne’e.
Notísia relevante: Governu hakotu Serka Sanitária iha Baucau, mantein Dili loron hitu
Tuir Roberto, parte diresaun loke hikas atendimentu públiku hafoin termina serka sanitária Baucau, maski nune’e aplika regra saúde ba prevensaun COVID-19 hanesan uza máskara, halo distansiamentu fíziku inklui fase liman beibeik.
Alende ne’e, Diresaun Transporte daudaun ne’e halo koordenasaun ho Komandu Polísia Nasionál Timor-Leste (PNTL) Baucau hosi Diresaun Tránzitu kona-ba atendimentu rodaviáriu hanesan xapa matríkula no dokumentu relevante seluk.
Jornalista : Natalino Belo
Editora : Julia Chatarina
