Governu kontinua esforsu normaliza COVID-19 iha TL
DILI, 11 agostu 2021 (TATOLI)—Governu kontinua esforsu uza liña orientasaun tolu atu normaliza situasaun COVID-19 iha Timor Leste (TL).
“Komisaun interministeriál ne’ebé ha’u lidera, iha liña orientasaun tolu importante atu orienta komportatamentu Governu ho objetivu ida de’it atu avansa lalais vasina, nune’e fila-fali ba normalizasaun,” Taur Matan Ruak, hateten iha serimónia entrega vasina AstraZeneca hosi Governu Austrália, iha edifísiu Serbisu Autónomu Medikamentu no Ekipamentu Saúde (SAMES) Kampung Alor kuarta ne’e.
Notísia relevante:Governu Austrália apoiu tan vasina AstraZeneka 300.000 ba Timor-Leste
Liña orientasaun dahuluk, Governu hanoin hela sei luta makás atu moras ne’e bele to’o zero iha TL, maibé ida ne’e hanesan iluzaun ida, tanba COVID-19 sei la lakon no sei hela metin no sei dezenvolve aan depende ba nia variante sira ho nível agresibilidade aumenta ka diminui.
Entaun, moras ida-ne’e provavelmente konsidera hanesan moras baibain no sei moris hamutuk iha tempu naruk.
Daruak, kampaña vasinasaun mak dalan ida ne’ebé atu minimiza risku ba sidadaun-sira atu lori ba faze normalizasaun tuir definisaun katak to’o 70% ba ema ida-idak nia-an, nune’e fila-fali ba normalizasaun.
“Tanba ne’e lori Governu no povu TL nia-naran agradese ba Governu Austrália liuliu Primeiru Ministru Austrália no Embaixadór iha ne’e, ba serbisu di’ak no parseria ida ne’e, hodi oferese tan AstraZeneca doze 300.000,” Taur Matan Ruak, agradese.
Datoluk, maka Governu hakarak responsabiliza sidadaun-sira ne’ebé mak la simu vasina ba risku no ba sira-nia moris rasik.
Iha fatin hanesan, Embaixadór Austrália iha TL, Peter Roberts, sente kontente tanba bele oferese tan vasina AstraZeneca 300.000 ba Governu TL.
Nia espera katak, ho apoiu ne’ebé iha sei bele ajuda duni Governu TL hodi kombate surtu COVID-19 iha país ne’e.
Governu TL simu ona dosaun vasina adisionál hosi Governu Autrália hamutuk doze 577.850, hosi COVAX Facility doze 124.800, Governu Xina doze 100.000, Governu Portugál doze 12.000 no totál doasaun hamutuk doze 814.650.
Jornalista: Felicidade Ximenes
Editór: Cipriano Colo
