COVALIMA, 11 agostu 2021 (TATOLI)-Komisaun A Parlamentu Nasionál ba asuntu Konstituisaun no Justisa, kuarta ne’e, iha Otél Joya, Covalima, diskute projetu-lei podér lokál, desentralizasaun administrativa no projetu-lei eleitorál munisipál.
Diskusaun iha faze espesialidade ne’e aprova ona artigu hamutuk 22 kona-ba projetu-lei númeru 6/V/(2a) kona-bá lei podér lokál no desentralizasaun administrativa.
“Ami hahú diskute projetu lei podér lokál no desentralizasaun administrativa ho karakterístika administrativa sira-nia símbolu no devér,” prezidente Komisaun A PN, Joaquim dos Santos “Boraluli”, informa ba jornalista sira iha Munisípiu Covalima.
Deputadu Joaquim “Boraluli” esplika projetu lei podér lokál desentralizadu administrativa aprova ona artigu hamutuk 22, diskute dispozisaun jerál hodi ko’alia kona-bá munisípiu, kompeténsia, relasaun instituisaun, intervensaun hosi Governu sentrál molok atu diskute espesífiku funsaun polítika munisipál sira nian
Iha sorin Seluk, membru PN hosi Bankada CNRT, Patrocínio Fernandes hateten, projetu lei podér lokál no eleisaun munisipál nia proponente mai hosi bankada CNRT, PLP ho Khunto.
“Ami nia interese lori governasaun hakbesik ba povu tanba ne’e presiza iha projetu lei podér lokál,” Deputadu Patrocínio Fernandes argumenta.
Projetu-lei eleitorál munisipál iha artigu hamutuk 135 no projetu-lei podér lokál no desentralizasaun administrativa iha artigu hamutuk 183.
Projetu-lei eleitorál munisipál ne’e bazeia ba Konstituisaun RDTL artigu 65 númeru 1, ne’ebé define órgaun eleitu ho soberania no eskolla liuhosi eleisaun, mediante sufrájiu universal, livre, diretu, sekretu, pesoál no periódiku. Nune’e mós projetu-lei podér lokál no desentralizasaun administrativa ne’e konstitui ho pesoa koletiva iha territóriu nasionál ba órgaun reprezentativu sira-ne’ebé define organizasaun, kompeténsia, funsionamentu no kompozisaun define iha lei.
Jornalista : Celestina Teles
Editór : Francisco Simões
