DILI, 11 agostu 2021 (TATOLI)-–Ministériu Obra Públika (MOP) hamutuk ho ajénsia no orgaun outónomu sira halo ona koodenasaun ho Ministériu Administrasaun Estatál (MAE) hodi rezolve problema infraestrutura bázika iha postu administrativu Atáuro, munisípiu Dili.
“Primeiru-Ministru fó ona orientasaun ba Ministériu Obra Públika liuhosi ajénsia no orgaun outónomu tutela sira atu ajuda instala infraestrutura bázika iha Ataúro tanba iha loron 01 janeiru 2022 sai ona munisípiu espesiál,” Ministru Obra Públiku, Salvador Eugênio Soares dos Reis Pires, hateten, iha Palásiu Governu, kuarta ne’e.
Antes ne’’e, MOP ho koordenasaun MAE haree kada planu investimentu hanesan estrada, bee, sanameamentu no eletrisidade ne’ebé sei halo.
“Ita halo ona planu ba estrada, bee no instalasaun eletrisidade. Kona-ba estrada, Insititutu Jestaun Ekipamentu, (IGE, sigla portugés) halo hela atendimentu hodi mellora estrada atu movimentasaun povu ba atividade ekonómika,” nia akresenta.
Primeiru Ministru, Taur Matan Ruak, fó ona orientasaun Eletricidade de Timor-Leste, Empreza Públika (EDTL, E.P) hodi rezolve problema infraestrutura bázika hanesan kondisaun fornesimentu bee ba abitante iha Ataúro no simu ona proposta hosi líder komunitáriu atu hadi’a sistema bee-moos.
Enkuantu, EDTL, E.P hahú lansa no promove projetu eletrifikasaun ba suku tolu iha Ataúro, ne’ebé suku rua hanesan projetu foun no suku ida halo manutensaun ba liña ezistente.
Durante ne’e, komunidade iha illa Ataúro utiliza liña eletrsidade iha tempu kalan oras lima de’it, tanba kombustível la sufisiente atu uza ba jeradór hodi fornese eletrisidade iha oras 24 nia laran.
Ho kestaun ne’e, empreza estatál ne’e tau ona planu ba tinan oin atu halo intervensaun, nune’e, funsiona eletrisidade ho normál.
Jornalista : Florêncio Miranda Ximenes
Editora : Julia Chatarina
