OÉ-CUSSE, 11 agostu 2021 (TATOLI)-Produtór masin lokál hosi bairru Numbei ho bairru Masin, aldeia Sanane, suku Costa, sub-rejiaun Pante Makasar, Rejiaun Administrativu Oé-Cusse Ambeno (RAEOA) husu ba Governu atu involve masin lokál iha programa Cesta Bázika iha futuru.
Produtór masin lokál sira RAEOA observa katak iha programa rekuperasaun ekonomia liuhosi distribuisaun Cesta Bázika, Governu sosa produtu lokál hanesan batar, mantolun, fore-rai, na’an no modo, maibé haluha tiha masin lokál ne’ebé komunidade maka prodús rasik iha rai-laran.
Agustinho Cabral iha bairru Masin, aldeia Sanane, hateten, nu’udar produtór masin lokál husu ba Governu sentrál no Rejiaun Administrativa Espesiál OÉ-Cusse Ambeno atu tau konsiderasaun ba produtu masin lokál, nune’e iha futuru bele sai produtu rekuperasaun ekonomia iha Cesta Bázika.
“Uluk ami rona Cesta Bázika ami kontente tanba Governu atu sosa ami-nia produtu ne’e, maibé to’o ikus sosa fali mak batar, koto, modo, na’an, maibé masin lokál haluha tiha,” Agustinho Cabral tenik.
Iha fatin hanesan, konsellu bairru Biliku Numbei hatete, iha situasaun estadu emerjénsia Governu ajuda nia povu liuhosi rekuperasaun ekonomia, hola produtu lokál barak, nune’e nia husu atu tau konsiderasaun ba produtu rai-laran
Autoridade lokál Biliku Numbe observa, iha komunidade barak uza produtu masin ne’e fa’an de’it iha merkadu, hodi sustenta sira-nia moris no ajuda dudu oan sira ba eskola, maibé ho serka sanitária ne’e prezudika sira la hetan rendimentu.
Jornalista : Abílio Elo Nini
Editór : Francisco Simões
