AILEU, 12 agostu 2021 (TATOLI)-–Abitante iha suku Fatisi, Tohumeta no Bokolelu, postu administrativu Laulara, munisípiu Aileu, seiauk asesu eletrisidade, nune’e husu Ministériu Obra Públika (MOP) liuhosi Elericidade de Timor-Leste, Empreza Públiku (EDTL) atu dada liña eletrisidade.
“Iha fatin ne’e, suku tolu ho totál populasaun 4.000-resin seidauk asesu totalmente ba liña distribuisaun eletrisidade, ne’ebé difikulta labarik sira estuda no halo atividade,”Administradór postu Laulara, Jacinto Borges, hateten, bainhira partisipa diálogu komunitáriu hosi Ministru Obra Públika, Salvador Eugênio Soares dos Reis Pires, ho komitiva iha suku Fatisi, Laulara, kinta ne’e.
Aleinde eletrisidade, Administradór postu hato’o preokupasaun kona-ba asesu bee-moos, tanba iha postu ne’e kuandu bai-loron naruk komunidade susar asesu bee-moos hodi responde ba nesesidade uma-laran.
“Ami husu Governu rezolve bee-moos, maibé importante liu mak eletrisidade tanba suku tolu sei iha nakukun laran, ne’ebé fó impaktu ba labarik sira estuda no atividade karpiteiru, ortikultura no seluk tan,” nia akresenta.
Iha tinan 2016, harii ona riin eletrisidade iha suku Tohumetan, maibé seidauk halo instalasaun, nune’e autoridade postu husu atu aselera prosesu.
Biban hanesan, Xefe suku, Fatisi, Januário Guterres, hateten, falta eletrisidade fó impaktu maka’as ba komunidade.
“Ami husu tanba suku ne’e nia totál populasaun 757, hosi uma-kain 172 mak seidauk asesu eletrisidade,” nia informa.
Suku tolu inklui iha pakote 34
Hatan ba kestaun ne’e, Ministru Salvador hateten, daudaun Governu hahú foku ba suku ne’ebé seidauk asesu liña distribuisaun eletrisidade, nune’e iha tinan ne’e loke konkursu públiku.
“Ita-nia totál suku ne’ebé seidauk asesu eletrisidade iha territóriu tomak hamutuk 76, ne’ebé EDTL,E.P lansa faze dahuluk ona pakote 34, ne’ebé iha inísiu setembru tinan ne’e sei lansa tan restu ba suku ne’ebé seidauk kompleta ,” nia tenik.
Governante ne’e dehan, iha lansamentu faze daruak, suku tolu ne’e sei inklui iha laran, liuliu suku Tohumetan, Fatisi no Bokolelo, inklui suku seluk iha Aileu ne’ebé seidauk asesu eletrisidade.
EDTL, E.P fó prioridade ba suku iha territóriu nasionál ne’ebé seidauk asesu eletrisidade, hafoin tinan oin (2022) atu halo intervesaun ba aldeia ne’ebé seidauk hetan asesu ba liña eletrisidade.
“Ita iha kondisaun rua ba aldeia sira hanesan jeográfikamente asesu ba sira-nia fatin, laiha dezafiu atu instala liña distribuisaun ita avansa ho liña distribuisaun, se aldeia ho jeografikamente izoladu no atu lori liña distribuisaun ba karun liu, entaun ita avansa ho solár panel,” nia hatutan.
Tanba Governu mós iha programa eletrifikasaun rurál ne’ebé kada tinan Governu liuhosi MOP uza orsamentu transferénsia públika hodi grupu komunitáriu sira bele instala solar panel ba aldeia sira ne’ebé jeográfikamente izoladu.
Nune’e, EDTL, E.P sei lansa faze daruak konkursu públiku iha setembru tinan ne’e, ba instalasaun eletrisidade iha munisípiu Aileu hanesan suku Liurai, Fatisi bá Tohumeta, suku Bereleu to’o suku Faturilau no Acubilitoho to’o Betulau.
Kona-ba bee-moos, MOP sei aprezenta ezijénsia komunidade nia ba BTL, E.P atubele rezolve.
Iha tinan 2019, Governu liuhosi MOP halo sistema bee tanke iha suku Liurai, postu administrativu Remexio, instala mós sistema bee ho tanke litru 5.000 liuhosi mota Mantani ne’ebé konstrusaun sei la’o hela.
Jornalista : Florêncio Miranda Ximenes
Editora : Julia Chatarina
