COVALIMA, 12 agostu 2021 (TATOLI) – Autoridade relevante hosi Ministériu Turizmu, Komérsiu no Indústria (MTCI, sigla portugés), kinta ne’e, hala’o sensibilizasaun kona-ba turizmu komunitária ba autoridade lokál no diretór munisipál iha Munisípiu Covalima.
“Ita ko’alia turizmu komunitária la’ós buat foun turizmu komunitária sira mak hanesan bee-manas Marobo, bee-manas Dolok oan no seluk tan,” Vise-Ministra Turizmu Komunitária, Inácia da Conceição Teixeira hateten iha nia diskursu iha ámbitu serimónia sensibilizasaun ne’e.
Nia esplika, VIII Governu Konstitusionál nia mekanizmu implementasaun foku liu oinsá atu dezenvolve atividade integradu atu responde ba turizmu ne’e rasik. Ho nune’e, turizmu komunitária nu’udar ambarella ba dezenvolvimentu turizmu no komunidade sira mak sai na’in ba turizmu.
Governu nia papél, tuir nia, atu fasilita prosesu oinsá atu dezenvolve fatin hodi sai fatin turizmu atu atrai turista doméstiku no estranjeiru, nune’e bele lori reseita ba povu.
Administradór Munisípiu Covalima, Francisco de Andrade, husu ba autoridade lokál no diretór munisipál sira atu aproveita hodi rona informasaun kona-bá turizmu komunitária.
“Ita tenke aproveita tempu ida-ne’e atu halo sensibilizasaun kona-ba turizmu komunitária iha Covalima,” Francisco hateten.
Covalima hanesan potensialidade ba fatin turizmu ne’ebé mak identifika ona hanesan iha Suai Loro, Dato Tolu no seluk tan.
Jornalista : Celestina Teles
Editór : Francisco Simões
