OÉ-CUSSE, 12 agostu 2021 (TATOLI)-Autoridade Rejiaun Administrativa Espesiál Oé-Cusse Ambeno (RAEOA), kinta ne’e, selebra memorandu entendimentu (MoU/Memorandum of Understanding) ho Ajénsia internasionál Marie Stopes hodi reforsa atendimentu servisu saúde sexuál reprodutiva no mós planeamentu familiár ba tinan lima iha Oé-Cusse.
Outreach & Centre Channel Manajer Marie Stopes RAEOA, Nivio Benevides, hateten Marie Stopes hetan apoiu fundus hosi Governu Australia programa DFAT atu servisu hamutuk ho Ministériu Saúde (MS) hala’o atendimentu ba servisu saúde sexuál reprodutiva no mós planeamentu familiár.
“Selebrasaun MoU ne’e atu kontinua reforsa, tanba ami servisu hamutuk no uza fasilidade Ministériu Saúde iha Oé-Cusse, nune’e presiza estabelese akordu ida, oinsá kna’ar no responsabilidade kontribuisaun saida mak ita hala’o nune’e bele fasilita servisu atendimentu ba iha planeamentu familiár no sexuál reprodutiva,” Nivio Benevides haktuir ba Agência Tatoli hafoin selebrasaun MoU iha Edifísiu ZEESM Oé-Cusse.
Nia dehan, ho selebrasaun ne’e atu asegura katak prezensa Ajénsia Marie Stopes iha Oé-Cusse hetan mós rekoñesimentu hosi autoridade RAEOA, tanba antes ne’e selebra ona MoU maibé daudaun ne’e inválidu ona.
Sekretáriu Rejionál Asuntu Saúde, Manuel da Costa, hatete selebrasaun MoU ne’e hetan akompañamentu hosi Prezidente Autoridade RAEO, Arsénio Paixão Bano, nune’e bele hametin di’ak liután atendimentu programa planeamentu familiár no sexuál reprodutivu iha Oé-Cusse.
“objetivu estabelese MoU ho ajénsia Marie Stopes bele apoia autoridade hanesan parseria ba programa implementasaun ba saúde familiár tanba sei halo atendimentu direita iha sentru saúde no postu saúde sira iha Oé-Cusse,” nia tenik.
Jornalista : Abílio Elo Nini
Editór : Francisco Simões
