Abitante Suku Matai la asesu bee-moos
COVALIMA, 13 agostu 2021 (TATOLI)-Abitante Suku Matai, Postu Administrativu Maukatar, Munisípiu Covalima, daudaun ne’e la asesu ba bee-moos tanba makin bomba bee avaria no seidauk halo manutensaun.
“Ami nia abitante iha suku Matai la asesu bee moos tanba presiza halo manutensaun mákina ne’ebé maka avaria ona,” Xefe Suku Matai, João Gusmão, informa ba Agência Tatoli iha Suku Matai, sesta ne’e.
Maske Programa Nasionál Dezenvolvimentu Suku (PNDS) halo ona perfurasaun bee-moos maibé mákina avaria ona nune’e prejudika abitante sira asesu bee-moos ho sufisiente. Populasaun iha Suku Matai kompostu hosi aldeia hat ho nia populasaun 3,687.
Diretór Servisu Agua no Saneamentu (SAS) Munisípiu Covalima, Castro Dody Ramos, rekoñese mákina rua bomba bee-moos iha Suku Matai avaria no tuir planu atu hadi’a iha 2022 ho orsamentu hosi PNDS.
“Ami iha planu maibé ita la iha orsamentu atu hadi’a. Mákina bomba bee avaria SAS identifika la’ós iha Suku Matai de’it maibé iha postu hotu kuaze avaria,” Castro Dody hateten.
Jornalista : Celestina Teles
Editór : Francisco Simões
