DILI, 13 agostu 2021 (TATOLI)—Asosiasaun Defeza Konsumidór Timor-Leste, TANE Konsumidór, simu reklamasaun hosi komsumidór ida, ne’ebé deteta foos a’at ho marka Tali Merah ne’ebé sosa iha loja Creative, Bidau Akaderu-hun.
“Ami horiseik simu reklamasaun ida hosi konsumidora ida ne’ebé lakohi fó sai ninia identidade, kona-ba prátika merkadu la loos. Ami halo analiza ba iha kestaun ne’e ho rigór no ohin ekipa jurídiku TANE tun terrenu no konfirmadu duni buat ne’ebé relata hosi konsumidora ne’e,” Asesór Jurídiku TANE Konsumidór, Juvéncio Ximenes, informa ba Agência TATOLI, via telefónika, sesta ne’e.
Tuir Juvéncio, foos ne’e iha data validade, maibé tanba foos importadu ne’ebé transporta via marítima ho kontentór hosi Indonézia, parese kona tasi been.
“Konsumidór sira ba hola foos, embora iha prazu validade maibé tanba kontamina tasi been halo foos a’at,” nia akresenta.
Bazeia ba dadus ne’ebé TANE konsumidór hetan iha terrenu, jerente loja ne’e rasik orienta ona traballadór sira hodi hasai foos, fase no halo filafali empakotamentu foun iha saku hodi fa’an filafali.
“Pur volta tonelada lima resin transporta ona ba munisípiu Baucau, Ermera no Liquicá, tanba ne’e ami tun ba hamutuk ho ekipa Ministériu Turizmu Komersiu no Indústria (MTKI) liuhosi Diresaun Regula Komersiál no Protesaun Konsumidór, Autoridade Inspesaun Fiskalizasaun Atividade Ekonómika, Sanitária no Alimentar (AIFAESA) no TANE ohin ba tau ona segel. Tanba sasán ne’e iha hela problema laran no ha’u dehan akontesementu ne’e sériu tanba implika ba ema-nia saúde no vida, ida-ne’e ita tenke tau atensaun no medida urjénsia, ita labele tolera tanba ita la hatene maluk timor-oan hira mak konsumu ona,” nia dehan.
Tuir Asesór Jurídiku ne’e, loloos produtu a’at labele tau iha merkadu hodi konsumidór sira sosa no konsumu.
Jornalista : Natalino Costa
Editorta : Julia Chatarina
