DILI, 13 agostu 2021 (TATOLI)–Jestór Nasionál Empreza Timor Resources Pty Ltd, Filomeno de Andrade, hasoru Primeiru-Ministru, Taur Matan Ruak, hodi aprezenta preparasaun ba perfurasaun mina-matan dahuluk iha rai-maran área Suai.
“Ami informa ba Primeiru-Ministru tanba daudaun ami halo preparasaun atu halo perfurasaun, maibé Timor Resources hasoru dezafiu atu lori tékniku internasionál tama mai Timor-Leste. Nune’e ami husu Governu liuhosi Primeiru-Ministru fó autorizasaun espesiál konsensionál atu tékniku internasionál tama mai,” Jestór Empreza Timor Resources, hateten iha Pálasiu Governu, Dili, sesta ne’e.
Notísia relevante: Governu atribui lisensa ambientál ba Timor Resources fura mina-matan
Empreza ne’e hasoru difikuldade tanba Governu impoin regra iha ámbitu pandemia, enkuantu empreza halo hela prepara ne’ebé presiza tékniku sira.
Iha reuniaun ne’e, empreza australiana aprezenta ba Xefe Governu kona-ba dezafiu hanesan interpretasaun legál kontratu nia, ne’ebé daudaun diskute hela ho parseiru Timor Gás no Petróleu, Empreza Públika (Timor GAP, E.P) no Ministériu Petróleu no Minerál (MPM) hodi bele halo perfurasaun ho di’ak.
Aleinde ne’e, Filomeno de Andrade, informa atividade seluk, ne’ebé Timor Resources hala’o ein termu konteúdu lokál, tanba la’ós foku ba atividade perfurasaun, maibé apoiu mós komunidade asesu ba bee-moos no ai-han liuhosi projetu ortikultura.
“Ami fiar katak Timor Resources hanesan parseiru di’ak ba Estadu Timor-Leste tanba bele ajuda dezenvolve ita-nia nasaun,” nia garante.
Kona-ba prosesu preparasaun prefurasaun, iha planu atu realiza iha loron 21 setembru, maibé situasaun pandemia no tékniku internasionál ne’ebé balun sai ona hosi Jakarta mai Kupang atu mai Timór, maibé seidauk konsege.
“Ami hein atu hetan autorizasaun espesífiku konsesionál atubele tama iha Suai halo perfurasaun, tanba mákina mai hotu ona, ne’ebé ami presiza semana neen no ualu, maibé hein hela tékniku mai,” nia hatutan.
Nune’e, empreza petrolífera ne’e adia atividade perfurasaun ba fulan-outubru, maibé depende Governu fó autorizasaun ba tékniku sira tama Timor-Leste.
Perfurasaun dahuluk iha Suai, iha área Matai bloku Karau ho kle’an metru 1.000, ho estimasaun perfurasaun loron 17.
Hafoin perfurasaun posu dahuluk, kontinua ba posu daruak iha mós área Suai, iha suku Camasa, bloku Samfu ne’ebé ho kle’an metru 1.400, ho estimasaun perfurasaun loron 21 to’o 22.
“Ami hanoin prosesu perfurasaun iha Suai, bainhira hahú no ramata atividade, bele aruma ekipamentu no mákina durante loron 21 no monta fali ba bloku seluk iha área Manufahi,” nia tenik.
Governu liuhosi MPM no Autoridade Petróleu no Minerál (ANPM) fó ona lisensa ambientál ba bloku Manufahi, nune’e iha tempu badak bele halo prefurasaun iha tinan ne’e.
“Ami sei hakat liu mai perfurasaun entre munisípiu Manufahi no Ainaro, iha Foho Ai-lico ida, ne’e mak ami-nia planu, se bele perfurasaun tolu iha tinan ida ne’e, maibé presiza hein linsesa ambientál,” nia subliña.
Jornalista : Florêncio Miranda Ximenes
Editora : Julia Chatarina
