iklan

EKONOMIA, HEADLINE

AIFAESA observa daudaun folin foos iha Dili ho presu normál

AIFAESA observa daudaun folin foos iha Dili ho presu normál

Ekipa AIFAESA halo inspesaun iha armazen empreza Perissos, iha Fatuhada, kinta (06/02/2020). Imajen TATOLI/Antónia Gusmão

DILI, 16 agostu 2021 (TATOLI)–Diretór Operasaun Autoridade Inspesaun Fiskalizasaun Atividade Ekonómika, Sanitária no Alimentar (AIFAESA), Gabriel da Costa, informa, liuhosi atividade fiskalizasaun ekipa iha terrenu, nota katak presu foos iha Dili normál.

“Ha’u haree kona-ba nesesidade bázika hanesan foos, hosi parte departementu operasaun liuhosi sesaun komersiál, ami sempre halo atividade rutina hanesan inspesaun no fiskalisaun, liu-liu ba kompañia distributór haat ne’ebé sempre distribui foos, ami ba sira-nia fatin no haree katak folin foos sira-ne’e kontinua la’o normál, kilograma 25 agora ho presu $12,” Diretór Operasaun AIFAESA hateten iha ninia knaar fatin, Villa verde, segunda ne’e.

Tuir Diretór ne’e, bainhira halo atividade iha terrenu, distributór sira konta tuir situasaun pandemia halo atividade ekonómika difísil no hasoru difikuldade, kona-ba atu aluga ró lori sasán tanba folin hotu sa’e.

“Ne’ebé sira pasiénsia hasa’e folin nesesidade bázika, maibé ami haree sira hasa’e folin  foos sira to’o $0,50 to’o $1 de’it, la liu presu justu, ne’ebé sira la hasa’e liu to’o 10%, maibé 10% mai kraik, sa’e liu tama ona aktu krime no ami halo kedan auto notízsa hasoru empreza sira ne’e,” nia akresenta.

Dekretu-lei numeru 29/2011 kona-ba presu justu, mensiona katak operadór ekonómiku ne’ebé hasa’e folin produtu tantu materiál no nesesidade bazika liu 10%, konsidera hanesan krime no tenke prosesa, ne’ebé kuandu empreza distributór sira fa’an foos kilograma 25 ho folin $10 to’o $15, konsidera tama 10% no kategoria normál.

Jornalista : Natalino Costa

Editora     : Julia Chatarina

iklan
iklan

Leave a Reply

iklan
error: Content is protected !!