DILI, 16 agostu 2021 (TATOLI)–Membru Aliansa Labarik Feto, Valeria Jenifer Marques Lopes, informa, durante ne’e aliansa kapasita joven atu sai ‘Kampeaun ba Mudansa’ iha sosiedade.
“Ami–nia formasaun ho objetivu atu empodera labarik feto no mane sira atu hatene kona–ba igualdade jéneru no saúde reprodutiva, atu nune’e sira bele sai hanesan kampeaun ba mudansa iha sira–nia sosiedade rasik,” Membru aliansa hateten ba Agência TATOLI, via telefónika, segunda ne’e.
Formasaun ne’e rasik fahe ba parte rua, ba feto iha modul sia no ba mane iha lima, ne’ebé realiza durante semana ida.
“Matéria ba modul feto no mane hanesan de’it, ne’ebé iha ne’ebá ko’alia kona–ba igualdade jenéru, violénsia bazeia ba jenéru, saúde seksuál, no saúde reprodutiva. Maibé, ami halo diferénsia, bainhira to’o formasaun mane sira sei lori modul kona–ba feto no feto sira sei lori filafali modul kona–ba mane,” nia akresenta.
Grupu ne’e iha sesaun ida, ne’ebé foka ba ‘Kampeaun ba Mudansa’, ne’ebé antes ne’e fó ona formasaun ba partisipante sira liuhosi loke rejistrasaun online.
“Ami halo selesaun ba sira no fó formasaun ba sira, bainhira sira tuir formasaun ne’e, sira mak sai fali fasilitadór ba kolega sira ne’ebé foin daudaun ami fó formasaun ne’e,” nia hatutan.
‘Kampeaun ba Mudansa’ hala’o atividade desde tinan 2020 no iha ne’ebá Aliansa Labarik Feto fó formasaun ba partisipante hamutuk na’in–60, kompostu hosi mane na’in–30 no feto na’in–30, no ema hirak ne’e sai fali fasilitadór iha formasaun ne’ebé Aliansa Labarik Feto realiza iha semana kotuk, ba partisipante hamutuk 60.
Totál formadór hamutuk–15, ne’ebé mai hosi estudante no joven ein jerál.
Aliansa Labarik Feto estabelese hosi Plan Internasionál iha tinan 2018, ho objetivu atu empodera labarik feto, ho sede estabelesidu iha Dili, Aileu no Ainaro, membru hamutuk 300 resin, mai hosi joven no estudante.
Jornalista : Nelia Fernandes
Editora : Julia Chatarina