DILI, 16 agostu 2021 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, orienta ona ekipa tékniku atu observa pilár markasaun fronteira terrestre entre Timor-Leste ho Indonézia iha Motain ne’ebé atu lakon impaktu hosi mota boot iha fulan hirak liubá.
“MNEK nia tékniku sira mak ba halo hela levantamentu, ita hotu hatene markasaun ne’e atu lakon tanba mota boot iha fulan hirak liubá ne’e,” Ministra Adaljiza Magno informa ba Agência Tatoli iha edifísiu MNEK Dili, segunda ne’e.
Nia dehan, bainhira levantamentu dadus iha área refere remata foin foti desizaun atu halo bareira ruma, nune’e bele tahan mota labele sobu monu markasaun baliza Timor-Leste ho Indonézia.
Pilár markasaun sira-ne’e konstroi dezde tempu Portugés hodi termina baliza entre Timor Portugés ho Olanda.
Jornalista : Hortencio Sanchez
Editór : Francisco Simões
