OÉ-CUSSE, 17 agostu 2021 (TATOLI)—Dadus hosi Sekretáriu Rejionál Asuntu Saúde hatudu katak, to’o iha 17 agostu, abitante kuaze rihun 21-resin hosi sub-rejiaun haat iha Rejiaun Administrativa Espesiál Oé-Cusse Ambeno (RAEOA) simu ona vasina, ho nia persentajen hamutuk 48% hosi trajetu 43.963.
Notísia Relevante: Ekipa Konjunta Prevensaun COVID-19 RAEOA Identifika Ona Fatin Akollimentu
“Ita-nia trajetu atu atinje vasina hamutuk 43.963, agora atinje ona 48% hosi ema-ne’ebé simu ona vasina kuaze rihun 21-resin. Hirak ne’ebé simu ona vasina kompletu hamutuk 4,4%, nune’e iha loron 22 agostu ne’e autoridade sei halo abertura ba vasina doze daruak nian ba sira-ne’ebé simu doze dahuluk iha fulan juñu,” Sekretáriu Rejionál Asuntu Saúde, Manuel da Costa, infoma ba Agência Tatoli iha Sikluli, Suku Costa, Sub-Rejiaun Pante Makasar, Oé-Cusse, tersa ne’e.
Dirijente saúde ne’e hateten, servisu saúde rejionál kontinua hala’o teste swab ba fatin sira ne’ebé konsidera risku hanesan identifka ona positivu presiza teste swab ba família no viziñuu sira, tanba ne’e teste swab la’ós hala’o iha fatin hot-hotu maibé iha fatin ne’ebé afetadu.
Maske dadús positivu aumenta beibeik maibé servisu saúde rejionál jere servisu hotu-hotu kontrolu ba COVID-19 la’o, no servisu esensiál ne’ebé mak presta iha fasilidade saúde kontinua la’o, ho nuune’e labele hamosu moras seluk afeta ba komunidade liu-liu moras diarea, infesaun vias respiratóriu, TBC, lepra no moras da’et seluk tán.
“Ita-nia programa prioridade mak ekipa prevensaun no mitigasaun COVID-19 kada loron hala’o promosaun saúde atu esplika ba komunidade kona-ba moras ida-ne’e, nune’e komunidade labele tauk no hakbesik-an ba fasilidade saúde atu simu vasina,” nia dehan.
Entretantu totál kazu positivu kumpri izolamentu hamutuk na’in-100 no kumpre hela kuarentena obrigatóriu hamutuk 59.
Notísia Relevante: RAEOA rejista kazu pozitivu COVID-19 foun hamutuk 11
Jornalista : Abílio Elo Nini
Editór : Cancio Ximenes
