DILI, 17 agostu 2021 (TATOLI)–Ministru Koordenadór Asuntu Ekonómika (MKAE), Joaquim Amaral, husu ba ministériu implementadór atu aselera rezolve lista reklamasaun Cesta Bázika.
“Ida-ne’e ha’u koordena hela ho ministériu implementadór sira no ha’u husu atu rezolve lista pendente sira, dentru fulan-agostu nia-laran,” Ministru dehan iha resintu City 8, Manleuana, tersa ne’e
Nune’e, governante ne’e husu ba ministériu implementadór sira atu tau atensaun sériu atubele halo pagamentu ba sidadaun ne’ebé seidauk simu.
“Osan ba ida-ne’e iha, tanba ne’e ha’u dehan ita aselera,” nia akresenta.
Notísia relevante: MTKI sei rezolve reklamante Cesta Bázika hamutuk 21.000
Benefisiáriu ne’ebé simu ona Cesta Bázika hamutuk ema millaun 1,3 resin ona ka reprezenta 91,8% hosi totál benefisiáriu millaun 1,5, ne’ebé falta reklamante hamutuk 25.000 inklui balun ne’ebé laiha naran iha lista maibé seidauk simu produtu.
Hosi totál reklamante, 20.000 hosi Dili, enkuantu restu hosi Ermera no Ainaro.
Totál orsamentu ba programa Cesta Bázika hamutuk millaun $82, ba totál benefisiáriu millaun 1,5 iha territóriu tomak, tuir lista atuál hosi Ministériu Administrasaun Estatál (MAE).
Jornalista : Natalino Costa
Editora : Julia Chatarina
