AINARO, 17 agostu 2021 (TATOLI)–Xefe Kaza Sivil Prezidente Repúblika, Francisco de Vasconcelos, hateten, ainaro-oan presiza hamutuk hodi kontribui ba dezenvolvimentu nasionál.
“Prezidente Repúblika nia mensajen, husu ainaro-oan atu hamutuk serbisu maka’as liután hodi fó kontribuisaun ba dezenvolvimentu iha Ainaro no ba Timor-Leste tomak atu liberta povu hosi kiak no mukit,” Xefe Kaza Sivil fó sai mensajen Xefe Estadu bainhira halo diálogu ho autoridade munisipál no funsionáriu sira, iha salaun administrasaun munisipál, tersa ne’e.
Durante vizita ba Manufahi no Ainaro, Xefe Kaza Sivil apresia tanba populasaun barak mak halo atividade agrikultura hodi kuda produtu oin-oin no fa’an ba merkadu.
“Ha’u halo vizita iha Maubisse iha Sentru prosesamentu kafé no ortikultura, hafoin ba haree mós Institutu Boaventura Timor-Leste, sente haksolok tebes tanba iha Kosta Súl ne’e iha Dezenvolvimentu ne’ebé di’ak no komesa buras tebes no matak ba bebeik,” nia akresenta.
Xefe Kaza Sivil dehan, PR hakarak mai vizita munisípiu rua ne’e hodi rona direta preokupasaun populasaun.
“Ita-nia Prezidente Repúblika hakarak tebes, maibé médiku sira mak rekomenda adia viajen mai halo dialógu, maibé tempu badak atu mai iha munisípiu rua ne’e,” nia hatutan.
Notísia relevante: Kestaun saúde, PR Lú Olo adia vizita bá Manufahi
Iha biban hanesan, Prezidente Autoridade Munisípiu Ainaro, Leovogildo Amaral Pereira, agradese ba vizita Prezidente Repúblika, ne’ebé reprezenta hosi Xefe Kasa Sivíl rona no haree direta preokupasaun komunidade iha munisípiu Ainaro.
“Ha’u hakarak administradór postu administrativu haat no xefe suku 21 no xefe aldeia 131, ho populasaun 60.425, hato’o agradesementu ba Prezidente Repúblika nia Reprezentante ne’ebé hakat ona mai hodi haree besik preokupasaun komunidade,” nia dehan.
Diálogu komunitáriu ne’e akompaña mós hosi Ministru Edukasaun, Juventude no Desportu, Armindo Maia, Ministru Turizmu, Komérsiu no Indústria, José Lucas do Carmo da Silva, Vise-Ministra Solidariedade Sosiál, Signi Verdial, Vise-Ministru Agrikultura no Peska, Abílio Xavier de Araújo, Sekretáriu Estadu Formasaun Profisionál no Empregu, Alarico Rosário, Prezidente Komisaun F Parlamentu Nasionál, Noe da Silva Ximenes ‘Buka Tuir’ no Prezidente Komisaun G, António Verdial de Sousa.
Jornalista : Florêncio Miranda Ximenes
Editora : Julia Chatarina
