DILI, 18 agostu 2021 (TATOLI)—Diretór Operasaun Autoridade Inspesaun, Fiskalizasaun Atividade Ekonómia, Sanitária no Alimentár (AIFAESA), Gabriel da Costa, hateten, durante inspesaun iha munisípiu, rejista operadór ekonómiku ladún hasa’e ona folin produtu nesesidade bázika.
Autoridade halo inspesaun iha munisípiu Aileu, Ainaro, Same no Suai foin lalais ne’e no nota katak operadór ekonómiku sira ladún komete infrasaun hanesan antes ne’e.
“Uluk ami halo fiskalizasaun hetan infrasaun 10 ba leten, maibé agora hahú menus ona hosi tolu to’o lima, ne’e signifika katak AIFAESA nia preseza iha kada munisípiu halo operadór ekonómiku sira kumpre lejizlasaun no regra ne’ebé iha,” Diretór AIFAESA informa ba Agência TATOLI, iha ninia knaar fatin, Villa verde, kuarta ne’e.
Aleinde ne’e, autoridade observa katak loja ne’ebé fa’an produtu liu prazu, a’at no laiha lisensa mós hahú menus.
“Sira tauk tanba dala barak ona sira hetan sansaun no multa kiiik liu maka $1.000 no boot liu bele to’o $11.000, tanba ne’e sira agora komesa rigorozu tebes iha produtu, liu-liu ba nesesidade bázika,” nia akresenta.
Nune’e, parte AIFAESA sei kontinua halo inspesaun no fiskalizasaun ba operadór ekonómiku sira iha munisípiu sira hodi kontrola folin sasán nesesidade bázika.
Jornalista : Natalino Costa
Editora : Julia Chatarina
