VIQUEQUE, 18 agostu 2021 (TATOLI)—Ministériu Edukasaun Joventude no Desportu (MEJD), hala’o sensibilizasaun no sosialiazasaun kona-bá Polítika Edukasaun Inkluziva (PEI), ba estudante-sira iha munisípiu Viqueque.
“Ami kontinua hala’o sosializasaun no sensibilizasaun kona-bá jéneru, liuliu kona-bá edukasaun inkluziva, katak ema hotu-hotu iha direitu hanesan, la haree étniku, rasa, língua, kultura no kondisaun defisiénsia no normál,” Diretór Nasionál Planu no Inkluzaun MEJD, Afonso Soares, hateten ba jornalista Agência Tatoli, iha salaun serbisu edukasaun munisípiu Viqueque, kuarta ne’e.
Notísia relevante:MSSI Kontinua Konsulta Polítika Inkluzaun Ema ho Defisiénsia
Polítika Edukasaun Inkluziva ne’e atu konsiensializa ema hotu-hotu labele halo diferénsa ba estudante-sira ne’ebé defisiente, maibé haree sira hanesan liuliu iha direitu atu asesu ba buat hotu.
Antes ne’e MEJD hala’o ona sensibilizasaun ba estudante-sira iha munisípiu Baucau, inklui profesór-sira no autoridade lokál-sira, maibé tanba situasaun COVID-19 labele akumula ema barak.
Iha fatin hanesan, pontu fokál jéneru hosi MEJD, Eliana Magno de Araújo, haktuir Governu Timor-Leste iha komitmentu atu promove nafatin igualdade jéneru.
Nia dehan, sensibilizasaun pilár ida ba prevensaun Violénsia Bazeia ba Jéneru (VBJ) hosi 2017 to’o 2021, ne’ebé akontese beibeik iha sosiedade ninia leet, tanba estudante-sira presiza hatene hodi minimiza.
Turi planu, bainhira situasaun Covid-19 rekopera, parte MEJD sei halo sensibilizasaun to’o área rurál hodi partilla no disemina Polítika Edukasaun Inkluzaun, ba estudante no profersor-sira.
Baze ba hamosu polítika edukasaun inkluziva ne’e hatuur iha Konstituisaun Repúblika Demokrátika Timor-Leste (K-RDTL) artigu 16, ko’alia kona-bá, Ema hotu hanesan iha lei nia oin, labele halo diskriminasaun, tanba kór, suku, estatutu, jéneru, étnika, língua, estatu sosiál ba ekonomia, edukasaun no kondisaun fíziku.
Alende ne’e, iha artigu 17 ko’alia kona-bá feto ho mane iha direitu no obrigasaun hanesan iha família, polítika, ekonomia, sosiál no kultura.
Sensibilizasaun durante loron ida ne’e, hetan partisipasaun hosi estudante Eskola Ensinu Sekundáriu Jerál (ESJ) Santu Estevão, 4 Setembru Liseu no Eskola Sekundáriu Calisa, hamutuk na’in 250 ho profesór-sira.
Jornalista: Vitorino Lopes da Costa
Editór: Cipriano Colo
