BAUCAU, 18 agostu 2021 (TATOLI)—Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares, hateten, veteranu hamutuk 24 hosi Baucau ne’ebé luta ba libertasaun nasionál durante tinan 20 to’o 24 sai benefisiáriu programa konstrusaun uma.
Programa ne’e introdús hosi hosi Ministériu Asuntu Kombatente Libertasaun Nasionál (MAKLN).
“Baucau iha benefisiáriu 24, hanesan Komandante Taur Matan Ruak (atuál Primeiru-Ministru) no ninia membru sira ne’ebé hamutuk luta durante tinan 24 iha ai-laran no atuál Prezidente Konsellu Munisipál Kombatente Libertasaun Nasionál Baucau, Beredu’u,” Sekretáriu Jerál informa ba Agência TATOLI, iha ninia knaar fatin, Villa antiga, kuarta ne’e.
Notísia relevante: MAKLN-KKLN kria ekipa kontrola konstrusaun uma 96 ba veteranu
Entre benefísiariu 24 hosi Baucau, iha veteranu haat mak deside konstrui uma iha Metinaro, hanesan Veteranu Malibuti ne’ebé foin lalais inaugura ona uma, enkuantu seluk foin to’o faze konstrusaun no balun foin hahú konstrusaun.
“Ami foin lalais ba haree ona fatin, karik fulan oin bele halo levantamentu osan atu halo konstrusaun uma iha área Laga no Baguia,” nia akresenta.
Iha parte seluk, iha dadus veteranu barak mak seidauk loos inklui balun seidauk rejistu, nune’e Konsellu Veteranu hahú hikas halo verifikasaun dadus ba naran ne’ebé rejistu iha tinan 2009 no tuir planu sei kontinua rejista foun no verifika filafali dadus sira ne’ebé antes ne’e verifikadu ona.
“Pelumenus agora ita haree polítika Ministériu no Sekretaria Estadu asuntu kombatente nia programa furak tebes,” nia apresia.
Antes ne’e, Governu liuhosi MAKLN deside apoia osan hamutuk $40.000 ho mekanizmu transfere direta ba konta bankária ba kada veteranu ne’ebé dedika-an ba luta ukun rasik-an durante tinan 20 to’o 24 hodi konstrui uma ne’ebé dignu.
Objetivu hosi programa ne’e atu dignifika veteranu sira-nia dedikasaun ne’ebé hafoin tinan 1999 fila hosi ai-laran maibé laiha uma atu hela.
Orsamentu ne’ebé prevee ba programa harii uma ba veteranu sira hamutuk millaun $2,4, ho totál benefisiáriu 60 maibé ikus mai aumenta ba 96.
Jornalista : Natalino Belo
Editora : Julia Chatarina
